އައިލެންޑް އޭވިއޭޝަން ސާވިސަސް (އައިއޭއެސް) ގެ ޑެޕިއުޓީ މެނޭޖިން ޑައިރެކްޓަރު ކަމުން ވަކިކުރި އައިޝަތު ޖެނިފާ، އަލުން އެމަގާމަށް އައްޔަންކުރުމާއި ބަދަލު ދިނުމަށް ވަޒީފާއާ ބެހޭ ޓްރައިބިއުނަލުން ކުރި އަމުރަށް އަމަލުކުރުން ހައިކޯޓުން ހުއްޓުވައިފި އެވެ.
އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ޖެނިފާ އައްޔަން ކުރީ، ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 25 ޑިސެމްބަރު 2018 ގަ އެވެ. އެ މަގާމުން ޖެނީފާ ވަކިކުރީ މި ސަރުކާރުން ވެރިކަމަށް އައިސް މިދިޔަ އަހަރުގެ ފަހުކޮޅު ބޭއްވި އައިއޭއެސްގެ ބޯޑު ބައްދަލުވުމެއްގަ އެވެ.
ވަޒީފާ އިން ވަކިކުރީ ގަވައިދާ ހިލާފަށް ކަމަށް ކަނޑައަޅައިދިނުމާ އެކު ބަދަލު ނަގައިދިނުމަށް އެދި ޖެނިފާގެ ފަރާތުން ވަޒީފާއާ ބެހޭ ޓްރައިބިއުނަލަށް މައްސަލަ ހުށަހެޅީ މިދިޔަ މާޗު މަހު އެވެ. ޓްރައިބިއުނަލުން ޖެނީފާއާ އެއްކޮޅަށް މިދިޔަ އޮކްޓޫބަރު މަހު ވަނީ މައްސަލަ ނިންމާފަ އެވެ. އައިލެންޑް އޭވިއޭޝަނުން ވަނީ މިދިޔަ މަހު އެ ނިންމުން ހައިކޯޓުގައި އިސްތިއުނާފްކޮށް، އެ ނިންމުން ތަންފީޒު ކުރުން ފަސްކުރުމުގެ އަމުރަކަށް އެދިފަ އެވެ.
ހައިކޯޓުން އިއްޔެ ވަނީ އެ މައްސަލައިގައި ގޮތެއް ކަނޑައަޅަންދެން ޓްރައިބިއުނަލްގެ ނިންމުން ތަންފީޒު ކުރުމުގެ ގޮތުން އެއްވެސް ފިޔަވަޅެއް ނޭޅުމަށް އަމުރުކޮށްފަ އެވެ.
ޓްރައިބިއުނަލުން ނިންމި ނިންމުމުގައި ވަނީ، ޖެނިފާ ވަޒީފާއިން ވަކި ކޮށްފައި ވަނީ، މުވައްޒަފަކު ވަޒީފާއިން ވަކި ކުރުމަށް ހުއްދަ ކުރާފަދަ ހާލަތެއް މެދުވެރިވެގެން ކަމަށް ބުރަނުވެވޭތީ، އޭނާ ވަޒީފާއިން ވަކިކޮށްފައި ވަނީ ގާނޫނާ ހިލާފަށް ކަމަށެވެ. އަދި އޭނާ އަދާކުރަމުންދިޔަ މަގާމަށް އަނބުރާ ރުޖޫއަ ކުރުމަށް ވަނީ އަންގާފަ އެވެ.
ޖެނީފާ ވަޒީފާއިން ވަކިކޮށްފައި ވަނީ މުވައްޒަފަކު ވަޒީފާއިން ވަކި ކުރެވޭފަދަ އެކަށީގެންވާ ސަބަބެއް ނެތި ކަމަށް ބުރަވެވޭތީ ގެއްލުމުގެ ބަދަލެއްގެ ގޮތުން ވަޒީފާއިން ވަކިކުރި އިރު މުސާރަ އާއި އިނާޔަތްތަކުގެ ގޮތުގައި ލިބެމުންދިޔަ 57،171 ރުފިޔާގެ ނިސްބަތުން އެއް މަސް ދުވަހަށްވާ ފައިސާ ނަގައިދިނުމަށް ވެސް ވަނީ ކަނޑައަޅާފަ އެވެ.