"ބިންވެރިޔާ" ސްކީމްގެ ދަށުން ނުހައްގުން ގޯތި ދިން ކަމަށް ތުހުމަތު ކުރެވޭ މައްސަލައާ ގުޅިގެން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ވަޒީފާތަކުން ސަސްޕެންޑް ކުރުމަށް ފަހު، ކަނޑާލި 15 މުވައްޒަފުންނަށް އަލުން ވަޒީފާ ދީފި އެވެ.
މިދިޔަ އާދީއްތަ ދުވަހު ވަޒީފާ އިން ކަނޑާލި މުވައްޒަފުންގެ ތެރޭގައި ކުންފުނީގެ އެކިއެކި ޑިޕާޓްމަންޓްތަކުގެ އިސްވެރިން ހިމެނެ އެވެ. އެ މީހުންގެ ވަޒީފާ އަލުން ރުޖޫއަކޮށް ދިން އިރު، ތުހުމަތުތަކުގެ މައްސަލަ ތަހުގީގު ކުރަމުން އަންނާތީ 15 މުވައްޒަފުން ހިމެނޭ 20 މީހެއްގެ ޕާސްޕޯޓް ވެސް އޮތީ ހިފަހައްޓައިފަ އެވެ.
ނަމަވެސް ކަނޑާލި މުވައްޒަފުންނަށް އަލުންް ވަޒީފާ ދިނުމާ ގުޅޭ ގޮތުން އެޗްޑީސީން އަދި ރަސްމީކޮށް ވަކި އެއްޗެއް ނުބުނެ އެވެ.
އެ ކުންފުނީގެ ކޮރަޕްޝަންގެ މައްސަލަތަކެއް ފުލުހުންނާއި އޭސީސީން ތަހުގީގު ކުރަން ފެށީ، ކުރިން މެނޭޖިން ޑިރެކްޓަރަކަށް ހުންނެވި ފަޒުލް ރަޝީދުގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރަކަށް ހުންނެވި ފަޒީލް ރަޝީދަށް ނުހައްގުން "ބިންވެރިޔާ" ސްކީމްގެ ދަށުން ހުޅުމާލެ އިން ގޯއްޗެއް ދިން މައްސަލަ ފެންމަތިވުމާ ގުޅިގެންނެވެ.
އެކަމާ ގުޅިގެން އެޗްޑީސީގެ ޗެއާމަން ފިޔަވައި އެހެން ހުރިހާ ޑިރެކްޓަރުން މިދިޔަ ބުރާސްފަތި ދުވަހު ޕީސީބީން ސަސްޕެންޑްކޮށްފައި ވަނިކޮށް، ފަޒުލް ވަނީ ބުރާސްފަތި ދުވަހުގެ ރޭ މަގާމުން އިސްތިއުފާ ދެއްވައިފަ އެވެ. އޭގެ ފަހުން ސަރުކާރުން ވަނީ އެޗްޑީސީގެ އެމްޑީއަކަށް މައުރޫފް ޖަމީލް އައްޔަންކޮށްފަ އެެވެ.
އިއްޔެ ޕީސީބީން ވަނީ ކުންފުނީގެ ބޯޑުގެ ސަސްޕެންޝަން ވެސް އުވާލައިފަ އެވެ.