ރާއްޖޭން ބޭރުކުރަން އުޅުނު 582 ކިލޯގެ މިޔަރާއި މަޑިމަސް ކަސްޓަމްސް އިން ނައްތާލައިފި އެވެ.
ކަސްޓަމްސް އިން ބުނީ އެ ތަކެތި ފެނިފައިވަނީ ރާއްޖޭން ބޭރު ކުރުން މަނާ ތަކެތި ހުރި ކޮންޓެއިނާއެއް ބޭރުކުރަން އުޅުނު ކަމަށް ލިބުނު މައުލޫމާތަކާ ގުޅިގެން އެ ކޮންޓެއިނާ ބަލައި ފާސްކުރުމުގެ ތެރޭގައި ކަމަށެވެ.
މި ތަކެތި ނައްތާލާފައިވަނީ މިދިޔަ އާދީއްތަ ދުވަހު ކ. ތިލަފުށި ކުނި ނައްތާލާ ސަރަހައްދުގަ އެވެ.
ރާއްޖޭގައި މިޔަރު އަދި މަޑިމަސް ހިފުމަކީ މަނާ ކަމެކެވެ. ނަމަވެސް ބައެއް ފަރާތްތަކުން ގަވާއިދާއި ހިލާފަށް މިޔަރު ހިފައި އޭގެ އުރަހަ ވިޔަފާރީގެ ގޮތުގައި ބޭނުންކުރަމުންދާ މައްސަލަ ދޭތެރެ ދޭތެރެއިން ފެންމަތިވަމުންދެ އެވެ.