ލޯކަލް ގަވަމެންޓް މިނިސްޓްރީގެ ތެރެއިން ކޮރަޕްޝަނާއި ގުޅުންހުރި އެއްވެސް ކަމެއް ފެނިއްޖެނަމަ ވަގުތުން ރިޕޯޓުކޮށްދިނުމަށް މިނިސްޓަރު އާދަމް ޝަރީފް އުމަރު އިލްތިމާސްކުރައްވައިފި އެވެ.
އާދަމް ޝަރީފް މިކަމަށް އިލްތިމާސް ކުރެއްވީ މިއަދު ހެނދުނު އެ މިނިސްޓްރީގެ ހުރިހާ މުވައްޒަފުންނާއެކު ބޭއްވި ބައްދަލުވުމެއްގަ އެވެ.
އެ ބައްދަލުވުމުގައި އާދަމް ޝަރީފް ވަނީ ކޮރަޕްޝަނާ ދެކޮޅަށް ރައީސް ޑރ. މުހައްމަދު މުއިއްޒު ކުރައްވާ މަސައްކަތްތަކާ ގުޅިގެން، އެމަނިކުފާނުގެ އިރުޝާދާއެކު މިނިސްޓްރީގެ މުވައްޒަފުން ކޮރަޕްޝަނާ ދެކޮޅަށް މަސައްކަތް ކުރެއްވުމަށް އިލްތިމާސްކުރައްވާފަ އެވެ.
އެގޮތުން ކޮރަޕްޝަނާއި ފަސާދައާ ގުޅުންހުރި އެއްވެސް ކަމެއް ނުވަތަ ނިޝާނެއް ފެނުނު ނަމަވެސް ވަގުތުން މިނިސްޓަރަށް ރިޕޯޓް ކުރުމަށާއި އެފަދަ ކަންކަމުގެ މަޢުލޫމާތު ސަރުކާރުގެ ކަމާ ގުޅުންހުރި މުއައްސަސާ، އޭސީސީ އަށް ހިއްސާކުރުމަށް ވެސް މިނިސްޓަރު އިލްތިމާސްކުރެއްވި އެވެ.
މީގެއިތުރުން މި ސަރުކާރުން ކޮރަޕްޝަނާ ދެކޮޅަށް ކުރައްވާ ހިތްވަރުގަދަ މަސައްކަތްތައް ފާހަގަކޮށް، ރައީސް މުއިއްޒަށް މިނިސްޓްރީގެ މުވައްޒަފުން ވަނީ ޝުކުރު އަދާކޮށްފަ އެވެ.
މި ސަރުކާރުގެ ތެރޭގައި ކޮރަޕްޝަނަށް އެއްވެސް ޖާގައެއް ނޯންނާނެ ކަމަށް ދާދިފަހުން ރައީސް މުއިއްޒު ވަނީ ވިދާޅުވެފަ އެވެ.