ހަރަދު ކުޑަކުރުމުގެ ގޮތުން ވަކިކުރި ކަމަށް ސަރުކާރުން ބުނާ 228 މީހުންގެ މައުލޫމާތު ހާމަކުރަން އިންފޮމޭޝަން ކޮމިޝަނަރު އަހުމަދު އާހިދު މިއަދު އަންގަވައިފި އެވެ.
އިކޮނޮމިކް ރިފޯމް އެޖެންޑާގެ ދަށުން ހަރަދު ކުޑަކުރުމުގެ ގޮތުން 228 ސިޔާސީ މުވައްޒަފުން ވަކިކުރަން ނިންމެވިކަން ރައީސް ޑރ. މުހައްމަދު މުއިއްޒު އިއުލާން ކުރެއްވީ އޮކްޓޯބަރު 15, ގަ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަމިއްލަ ފަރުދެއް ކަމަށްވާ އަފްރާހު އިސްމާއިލް ރައީސް އޮފީހުގައި ވަނީ އެ 228 މީހުންގެ ނަމާއި, މަގާމާއި, މުސާރަ އަދި އައްޔަނުކޮށްފައި ތިބި އިދާރާގެ މައުލޫމާތު ދިނުމަށެވެ. ނަމަވެސް ރައީސް އޮފީހުން ވަނީ އެއީ ޒާތީ މައުލޫމާތުތަކެއް ކަމަށް ބުނެ އެ މައުލޫމާތުތައް ދޭން ދެކޮޅު ހަދައިފަ އެވެ.
ރައީސް އޮފީހުގެ ނިންމުން އިންފޮމޭޝަން ކޮމިޝަނަރުގެ އޮފީހުގައި ރިވިއު ކުރުމުން މިއަދު ބޭއްވި އަޑުއެހުމުގައި ވަނީ ހޯދަން އެދިފައިވާ މައުލޫމާތުތަކުގެ ތެރެއިން ދާއިމީ އެޑްރެހަކީ ދޫނުކޮށް ހިފެހެއްޓިދާނެ މައުލޫމާތުތަކެއް ކަމަށް ކަނޑައަޅާ ކަމަށެވެ. ނަމަވެސް ސިޔާސީ ގޮތުން އައްޔަންކޮށްފައިވާ ފަރާތްތަކުގެ ނަމާއި، މަގާމާއި، މަސައްކަތް ކުރި އިދާރާގެ މައުލޫމާތާއި، އެ ފަރާތްތައް ވަޒީފާ އިން ވަކިކުރި ތާރީހަކީ ގާނޫނުގެ ދަށުން ދޫނުކޮށް ހިފެހެއްޓޭނެ މައުލޫމާތުތަކެއް ނޫން ކަމަށް އެ ނިންމުމުގައިވެ އެވެ.
އެހެންކަމުން، އިންފޮމޭޝަން ކޮމިޝަނަރު ވަނީ ހޯދަން އެދިފައިވާ މައުލޫމާތުތައް ފަސް ދުވަހުގެ ތެރޭގައި ފޯރުކޮށްދިނުމަށް ކަނޑައަޅާފަ އެވެ.
ވަކިކުރި ކަމަށް ބުނާ ސިޔާސީ މުވައްޒަފުންގެ ތަފުސީލުތައް މިހާތަނަށް ސަރުކާރުން ހާމަކޮށްފައި ނުވާއިރު، ވަކިކުރަން ނިންމި މުވައްޒަފުންގެ ތެރޭގައި ހިމެނެނީ ހަތް ސްޓޭޓް މިނިސްޓަރުން, 43 ޑެޕިއުޓީ މިނިސްޓަރުން, 109 ސީނިއާ ޕޮލިޓިކަލް ޑިރެކްޓަރުން, އަދި 69 ޕޮލިޓިކަލް ޑިރެކްޓަރުންނެވެ.
މި ބަދަލާއެކު މަހެއްގެ މައްޗަށް 5.7 މިލިއަން ރުފިޔާ ސަލާމަތް ކުރެވޭނެ ކަމަށް ރައީސް މުއިއްޒު ވަނީ ވިދާޅުވެފަ އެވެ.