ރާއްޖެ ގެނައި އިންޑިއާގެ މަސައްކަތްތެރިންތަކެއް ހާލުގައި ޖެހިފައިވާތީ އެ މައްސަލަ ލޭބާ ރިލޭޝަން އޮތޯރިޓީ (އެލްއާރުއޭ) އިން ބަލަން ފަށައިފި އެވެ.
ލޭބާ ރިލޭޝަންސް އޮތޯރިޓީން ބުނީ ކޮންސްޓްރަކްޝަން މަސައްކަތަށް ރާއްޖެ ގެނެސްފައިވާ އިންޑިއާގެ 40 ފަރާތަކަށް އެއް މަހާއި 10 ދުވަހުގެ މުސާރަ ނުދޭކަމަށް ބުނެ އެ އޮތޯރިޓީއަށް މައްސަލައެއް ހުށައަޅާފައިވާ ކަމަށެވެ. އަދި އެމީހުން އެނބުރި ގައުމަށް ދާން ބޭނުންވާ ކަމަށްވެސް ބުނެފައިވެ އެވެ.
މި މައްސަލައާ ގުޅިގެން އެމީހުން ގެނައި ކުންފުންޏާ މުޢާމަލާތް ކުރުމުން، މުވައްޒަފުންނަށް ފައިސާ ނުދީ އޮތް މުއްދަތަށްވާ ފައިސާ ދިނުމަށްފަހު، އެނބުރި ޤައުމަށް ދާން ބޭނުންވާ މުވައްޒަފުން ފުރުވާލުމުގެ އިންތިޒާމު ހަމަޖައްސަމުން ގެންދާކަމަށް ކުންފުނިން މަޢުލޫމާތު ދީފައިވާ ކަމަށް އެލްއާރުއޭ އިން ބުނެ އެވެ.
މިމައްސަލަ ފެންމަތިކޮށްފައިވަނީ އިންޑިއާގެ ނޫސްތަކެއްގައި ކަމަށްވާއިރު، އެމީހުން ދީފައިވާ އިންޓަވިއުތަކުގައި ބުނީ އެމީހުން ރާއްޖެ ގެނައީ އިންޑިއާގެ ކުންފުންޏެއް ކަމަށްވާ ރެނާޓަސްގެ މަސައްކަތްތަކަކަށް ކަމަށާއި އެ މީހުންނަށް ވަރަށް ގިނަ ދަތިތައް ކުރިމަތިވަމުން އަންނަ ކަމަށެވެ. އަދި އެދެނީ އިންޑިއާ ސަރުކާރުން އެ މީހުން ސަލާމަތްކޮށްދީ ގައުމަށް އަނބުރައި ފޮނުވައި ދޭން ކަމަށް ބުނެފައިވެ އެވެ. އެ މީހުން ބުނެފައި ވަނީ އެޖެންޓެއް މެދުވެރިކޮށް އެ މީހުން ރާއްޖެ ގެނައީ މި އަހަރު ޖޫން އާއި ޖުލައި މަހުގެ ތެރޭގައި ކަމަށެވެ.
އަދި އެ މީހުންނަށް ރަނގަޅު މުސާރައެއް ދޭނެ ކަމަށް ބުނި ނަމަވެސް މުސާރަ ވެސް ނުދޭތާ ވެސް މިހާރު އެތައް މަހެއް ވެފައިވާ ކަމަށް ވެސް ބުނެފައިވެ އެވެ. އަދި އެކަމާ ދެކޮޅަށް އަޑުއުފުލުމުން ކުންފުނިން އެ މީހުންނަށް ބިރު ދައްކައި، އެންމެން އެކޮމޮޑޭޝަން ތެރޭގައި ބަންދުކޮށްފައިވާ ކަމަށް ވެސް ބުނެފައިވެ އެވެ. އަދި އެތަނުގައި ކަރަންޓް ކަނޑާލާފައި އޮތް ކަމަށް ވެސް މަސައްކަތްތެރިން ބުނެފައިވެ އެވެ.