ދިވެހި ފުޓްބޯޅަ ލާމަރުކަޒު ކުރަން ރާއްޖޭގެ ފުޓްބޯޅައިގައި ފާހަގަކޮށްލެވޭ ޝަހުސިއްޔަތެއް ކަމަށްވާ އަހުމަދު ޝަރީފު (ޑުންގާ) ގޮވާލައިފި އެވެ.
މުޅި ރާއްޖެ އަށް ހުޅުވާލައިގެން ބޭއްވި ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ކާމިޔާބީއާ ގުޅިގެން ފޭސްބުކްގައި ކުރި ޕޯސްޓެއްގައި ޑުންގާ ބުނީ ދިވެހި ފުޓްބޯޅަ ލާމަރުކަޒު ކުރުމަށް ގޮވާލާ ކަމަށާއި އެފްއޭއެމް ފެޑެރޭޝަނަކަށް ބަދަލުކޮށް، ރީޖަނަލް އެސޯސިއޭޝަންތައް ހަދަން ފުރުސަތު ދޭން ޖެހިފައިވާ ކަމަށް އަތޮޅުތަކުން ދައްކާފައިވާ ކަމަށެވެ. އަދި އެކަން ކުރުމުގެ ވަގުތު އައިސްފައިވާ ކަމަށް ޑުންގާ ބުންޏެވެ.
ރާއްޖޭގެ ފުޓްބޯޅަ ނަގާ ކޮޅަށް ޖެހުމާއި، އެކަމަށްޓަކާ ކުރަންޖެހޭ ހުރިހާ އިންވެސްޓްމެންޓެއް ކޮށްދިނުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
ނައިންޓީ ޕްލަސް ގޯލްޑް ކަޕްގެ ފައިނަލަށް ފަހު އެކްސްގައި ކުރެއްވި ޕޯސްޓެއްގައި ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވަނީ ކުރިމަގުގައި މުޅި ރާއްޖޭގައި ފުޓްބޯޅަ މުބާރާތްތައް ބޭއްވުމަށް ލޯކަލް ގަވަމެންޓް މިނިސްޓްރީ އިން ސްޕޯޓްސް މިނިސްޓްރީ އާއި ސިޓީ ކައުންސިލްތަކާއި އަތޮޅު ކައުންސިލްތަކާއި މަޝްވަރާ ކުރާނެ ކަމަށް ވިދާޅުވެފަ އެވެ.
ގޯލްޑް ކަޕަކީ މުޅި ރާއްޖެއަށް ހުޅުވާލައިގެން އަމިއްލަ ފަރާތަކުން ރާވާ، ހިންގި ފުޓްބޯޅަ މުބާރާތެކެވެ. މިދިޔަ މަހުގެ 20 ގައި ފެށި މި މުބާރާތުގައި ރާއްޖޭގެ އެކި ކަންކޮޅުތަކުން 17 ޓީމަކުން ވާދަކުރި އެވެ. ގޯލްޑް ކަޕްގެ ސަބަބުން ދިވެހި ފުޓުބޯޅައިގެ ފުރަތަމަ ޑިވިޝަނުގެ މޮޅު ކުޅުންތެރިންނާއެކު ކުޅުމުގެ ފުރުޞަތު، އައު ކުޅުންތެރިންތަކަކަށް ވަނީ ލިބިގެން ގޮސްފަ އެވެ.