އަޒަރްބައިޖާން އެއާލައިންސްގެ މަތިންދާބޯޓެއް ވެއްޓުމާ ގުޅިގެން ރައީސް ޑރ. މުހައްމަދު މުއިއްޒު، އަޒަރްބައިޖާންގެ ރައީސް އިލްހާމް އަލިޔޭވަށް ތައުޒިޔާ ފޮނުއްވައިފި އެވެ.
އަޒަރުބައިޖާނުން ފުރައިގެން ރަޝިއާގެ ކްރޮޒްނީ އަށް ދަތުރުކުރި އަޒަރުބައިޖާން އެއާލައިންގެ ޖޭ2-8243 ބޯޓް ވެއްޓުނީ މޫސުން ގޯސްވެ، ދަތުކުރަން ދަތިވާ ވަރަށް ފުސްވެ، ބޯޓް ކުއްލި ހާލަތުގައި ކަޒަކަސްތާންގެ އަކަޓޯސިޓީ އަށް ލޭންޑް ކުރުމުގެ ތެރޭގައި ބޯޓްގައި އަލިފާން ރޯވެ ވެއްޓިގެންނެވެ. އެ ބޯޓުން 67 މީހަކު ދަތުރުކުރިއިރު 38 މީހަކު ވަނީ މަރުވެފަ އެވެ.
ރައީސް ފޮނުއްވި ތައުޒިޔާގެ މެސެޖުގައި ވިދާޅުވީ ފްލައިޓު ވެއްޓުނު ހަބަރު އެއްސެވީ ފުން ހިތާމައާއި އެކުގައި ކަމަށާއި އެ ހާދިސާގައި އަސަރުކުރި މީހުންނާއި އެމީހުންގެ އާއިލާތަކަށް ދިވެހި ސަރުކާރާއި ރައްޔިތުންގެ ނަމުގައި ތައުޒިޔާ ފޮނުވާ ކަމަށެވެ.
މި ހާދިސާގެ ތަހުގީގު ނިމެންދެން އަޒަރްބައިޖާން އެއާލައިންސްގެ ހުރިހާ ދަތުރެއް ރަޝިއާގެ ޗެޗްނިޔާ ރީޖަނަށް ކުރުން ވަނީ މެދުކަނޑާލާފަ އެވެ.
މި ބޯޓުން ދަތުރުކުރި މީހުންގެ ތެރޭގައި އަޒަރްބައިޖާން އާއި ރަޝިއާ އާއި ކަޒަކިސްތާންގެ އިތުރުން ކިރިގާސްތާންގެ ރައްޔިތުން ހިމެނޭ ކަމަށް ރިޕޯޓުތައް ބުނެ އެވެ.
މި ހާދިސާއާ ގުޅިގެން ރަޝިއާ އަށް ކުރައްވަމުން ގެންދެވި ދަތުރުފުޅު ކުރުކޮށްލެއްވުމަށްފަހު އަޒަރްބައިޖާނުގެ ރައީސް ވަނީ އެނބުރި ގައުމަށް ވަޑައިގެންފަ އެވެ.