މިއަހަރުގެ މިހާތަނަށް 28 ފަރާތަކުން ގުރުއާން ހިތުދަސްކޮށްފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
މީޑިއާތަކާ ހިއްސާކުރެއްވި މެސެޖެއްގައި ޝަހީމް ވިދާޅުވީ މިއަހަރުގެ މިހާތަނަށް ގިނަ ބަޔަކު ޤުރުއާން ހިތުދަސްކޮށް، ހާފިޒުކަމުގެ އިމްތިހާން ހެދުމަށް އެދިފައިވާ ކަމަށާއި އެގޮތުން މިހާތަނަށް 28 މީހަކު މި އިމްތިހާނު ފުރިހަމަކޮށްފައިވާ ކަމަށެވެ.
އަދި ތިން ފަރާތަކުން އިމްތިހާނު ހަދަމުންދާ އިރު، ދެ ފަރާތަކުން އިމްތިހާނު ހަދަން ތައްޔާރުވެފައިވާ ކަމަށާއި ފަސް އަހަރުގެ ދަރިވަރަކު ދަސްކޮށްފައި މުރާޖައާ ކުރަން އެދިފައިވާ ކަމަށްވެސް ޝަހީމް ވިދާޅުވި އެވެ.
ޤުރުއާން ހިތުދަސްކޮށް ނިންމާ ދަރިވަރުންނަށް ހިތްވަރު ދިނުމުގެ ގޮތުން ޢުމްރާ އަށް ފޮނުވުމުގެ ޕްރޮގްރާމެއް ވެސް އިސްލާމިކް މިނިސްޓްރީން ވަނީ ފަށާފަ އެވެ.
މީގެއިތުރުން ޤުރުއާން ހިތުދަސްކުރާ ހާފިޒުންނަށް ދައުލަތުން ދޭ އިނާޔަތް ދެ ގުނަ ބޮޑުކުރަން ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ.