ރާއްޖޭގެ މައި އެއާޕޯޓް ކަމަށްވާ ވެލާނާ އިންޓަނޭޝަނަ؛ލް އެއާޕޯޓު (ވީއައިއޭ) ތަރައްގީ ކުރުމުގެ މަޝްރޫއަށް އަބޫދާބީ ފަންޑް ފޮ ޑިވެލޮޕްމަންޓް (އޭޑީއެފްޑީ) އިން ރާއްޖެއާ އެކު އިތުރު 40 މިލިއަން ޑޮލަރުގެ (616 މިލިއަން ރުފިޔާ) ލޯނު އެއްބަސްވުމެއްގައި ސޮއިކޮށްފި އެވެ.
އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސާ ޒަމީރެވެ.
އަބޫ ދާބީގައި ބޭއްވި އެއްބަސްވުމުގައި ސޮއިކުރުމުގެ ރަސްމިއްޔާތުގައި އަބޫދާބީ ފަންޑުގެ ޑިރެކްޓަ ޖެނެރަލް މުހައްމަދު ސައިފް އަލް ސުވައިދީ ވިދާޅުވީ މިއީ ރަހުމަތްތެރި ގައުތަކުގައި އުމްރާނީ ތަރައްގީ އަށް އަބޫދާބީ ފަންޑުން އަދާކުރަމުން އަންނަ މުހިންމު ދައުރު ހާމަވާ ކަމެއް ކަމަށެވެ. އެގޮތުން ވީއައިއޭގެ ތަރައްގީ އަށް އިިތުރަށް ދޭ ލޯނުން އެ އެއާޕޯޓް ޒަމާނީ ކުުރެވުމަކީ ރާއްޖެއަށް ލިބޭނެ ބޮޑު ކުރިއެރުމެއް ކަމަށް ވިދާޅުވި އެވެ.
ޒަމީރު ވަނީ ރާއްޖޭގެ ތަރައްގީ އާއި ކުރިއެރުމަށް އަބޫދާބީ ފަންޑުން ޒަމާނުއްސުރެ ފޯރުކޮށް ދެމުން އަންނަ އެހީ ފާހަގަ ކުރައްވައި ޝުކުރު އަދާކުރައްވައިފަ އެވެ. އޭނަ ވިދާޅުވީ ވީއައިއޭގެ ތަރައްގީގެ މަޝްރޫއާ އެކު، ގައުމީ ތަރައްގީގެ ލަނޑުދަނޑިތައް ހާސިލުކުރަން މަގުފަހިވެ، ޓޫރިޒަމުން ލިބޭ އާމްދަނީ އެތައް ގުނައެއް ވެސް އިތުރުވާނެ ކަމަށެވެ.
ވީއައިއޭގެ އާ ޓާމިނަލް އެއްކޮށް ބޭނުން ކުރަން ފެށުމުން އަހަރަކު ގާތްގަނޑަކަށް 7.5 މިލިއަން ފަސިންޖަރުންނަށް ހިދުމަތް ދެވޭނެ އެވެ.
ސަރުކާރުން އަންނަނީ އަންނަ އަހަރުގެ އާ ޓާމިނަލް މަޝްރޫއު ނިންމުމަށް މަސައްކަތް ކުރަމުންނެވެ.
ވީއައިއޭ ތަރައްގީގެ މަޝްރޫއުގައި ހިމެނޭ އާ ޓާމިނަލް އަވަހަށް ނިންމައި، ހުޅުވުމަށް ސަރުކާރުން މަސައްކަތް ކުރަމުން އަންނަ އިރު، މަޝްރޫއު އަވަސްކުރަން އަބޫދާބީ ފަންޑުން ކުރިން ވެސް 50 މިލިއަން ޑޮލަރު (771 މިލިއަން ރުފިޔާ) އަދި ސައުދީ ފަންޑުން 180 މިލިއަން ޑޮލަރު (2.8 ބިލިއަން ރުފިޔާ) ނަގާފައިވެ އެވެ.