އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީ އާއި އެވަޓަން ބައްދަލުކުރި މެޗު 1-1 އިން އެއްވަރުވެގެން ނިމިއްޖެ އެވެ.
މި މެޗުން ސިޓީ އެއްވަރުވިއިރު، އެންމެފަހުން ކުޅުނު 13 މެޗުގެ ތެރެއިން އެޓީމު މޮޅުވެފައިވަނީ އެންމެ މެޗަކުންނެވެ. މި ނަތީޖާއާއެކު 18 މެޗުން 28 ޕޮއިންޓު ހޯދައިގެން ސިޓީ އޮތީ ލީގުގެ ހަވަނައިގަ އެވެ.
އަމިއްލަ ދަނޑުގައި ކުޅުނު މި މެޗުގެ 14 ވަނަ މިނެޓްގައި ބަނާޑޯ ސިލްވާ ވަނީ ސިޓީ އަށް ލީޑު ނަގައިދީފަ އެވެ. މިއީ ޖެރެމީ ޑޮކޫ ތަނަވަސްކޮށްދިން ފުރުސަތަކުން އެވަޓަންގެ އޭރިއާ ތެރެއަށް ވަދެ ފޮނުވާލި ހަމަލާއަކުން ސިލްވާ ކާމިޔާބުކުރި ގޯލެކެވެ. ނަމަވެސް މެޗުގެ 36 ވަނަ މިނެޓްގައި އިލިމަން އެންޑިއޭ ވަނީ އެވަޓަނަށް ނަތީޖާ އެއްވަރުކޮށްދީފަ އެވެ. މިއީ ސިޓީގެ އޭރިއާ ތެރެއަށް ހުރަސްކޮށްލި ބޯޅައަކުން ކާމިޔާބުކުރި ގޯލެކެވެ.
ދެވަނަ ފަހަރަށް ލީޑު ނަގަން ސިޓީ އަށް މެޗުގެ 53 ވަނަ މިނެޓްގައި ޕެނަލްޓީއެއް ވެސް ލިބިފައިވެ އެވެ. ސިޓީގެ ސަވީނިއޯ އަށް ކުރި ފައުލަކާއި ގުޅިގެން ލިބުނު މި ޕެނަލްޓީ އާލިންގް ހާލަންޑް ފޮނުވާލުމުން އެވަޓަންގެ ގޯލްކީޕަރު ޖޯޑަން ޕިކްފޯޑް ވަނީ މަތަކޮށްފަ އެވެ.
މެޗުގެ ފަހު 15 މިނެޓްތެރޭ ގޯލެއް ކާމިޔާބު ކުރެވޭތޯ ސިޓީން ވަރަށް ބޮޑަށް މަސައްކަތް ކުރި ނަމަވެސް އެޓީމަށް އެކަން ކާމިޔާބު ކުރެވިފައެއް ނުވެ އެވެ.
ލީގުގައި ސިޓީން ދެން ބައްދަލުކުރާނީ ލެސްޓަ ސިޓީއާ އެވެ.