ބޭނުން ކޮށްފައި އުކާލެވޭ ތަކެތިން ތަފާތު އާތަކެތި އުފެއްދުމުގެ މައުރަޒެއް "ފިޠުރު ޢީދު އަޕްސައިކްލިންގ އެގްޒިބިޝަން" މިނަމުގައި މިއަދު މެންދުރުފަހު 14:00 އިން ހަވީރު 18:00 އާ ހަމައަށް، ޙިރާ ސްކޫލްގައި އޮންނާނެ ކަމަށް އެސްކޫލުން ހާމަކުރައްވައިފިއެވެ. މިއީ މިއަހަރުގެ ފިޠުރު ޢީދުގެ މުނާސަބަތުގައި ބޭއްވުމަށް ކަނޑައަޅާފައިވާ އެއް ޙަރަކާތެވެ.
އައްޑޫލައިވް އަށް މައުލޫމާތު ދެއްވަމުން ޙިރާ ސްކޫލްގެ ޕްރިންސިޕަލް އަލްފާޟިލާ މަރްޔަމް ސިތާރާ ވިދާޅުވީ، "އާ ތަޢުލީމީ މަންހަޖުގެ ދަށުން ދަރިވަރުންގައި ހަރުލައްވަންޖެހޭ މުހިއްމު ޤާބިލިއްޔަތުތައް ހަރުލެއްވުމުގައި ބެލެނިވެރިންގެ ރޯލަކީ ވަރަށް ބޮޑު ރޯލެއް ކަމަށެވެ. އެގޮތުން މި މައުރަޒު އަމާޒު ކުރެވިފައިވަނީ ތަޢުލީމީ މަންހަޖުގައި ހިމެނޭ އެއް ޤާބިލިއްޔަތު ކަމުގައިވާ "ދެމެހެއްޓެނިވި ތަރައްޤީއަށް މަސައްކަތްކުރުން" މި ޤާބިލިއްޔަތަށް ބެލެނިވެރިން އަހުލުވެރި ކުރުވުމަށް" ކަމަށެވެ.
"މާޙައުލަށް ރައްކާތެރިވުމަކީ މި ޤާބިލިއްޔަތުގެ މުހިއްމު ބައެއް. މި މައުރަޒުގެ ސަބަބުން ބޭނުންކޮށްފައި އުކާލަން ހުންނަ ތަކެތި އުކާލުމުގެ ބަދަލުގައި، އެތަކެތި ބޭނުންކޮށްގެން މުޅިން އާ އަދި ބޭނުންތެރި ތަކެތި އުފައްދާނެ ގޮތުގެ ފިކުރާއި އާ ޚިޔާލުތައް ލިބިގެންދާނެ" ކަމަށްވެސް ސިތާރާ ވިދާޅުވިއެވެ.
މާދަމާގެ މައުރަޒުގައި އެސްކޫލްގެ ބެލެނިވެރިން ތައްޔާރުކޮށްފައިވާ ތަކެތި ދައްކާލެވޭނެ ކަމަށާއި، އެތަކެތި ބައްލަވައިގަންނަވަން ބޭނުންފުޅުވާ ފަރާތްތަކަށް އެކަމުގެ ފުރުޞަތުވެސް ހުޅުވިފައިވާ ކަމަށް ސްކޫލުން މަޢުލޫމާތު ދެއްވައެވެ. މި ތަކެތި ވިއްކައިގެން ލިބޭ ފައިސާ ޚަރަދު ކުރެވޭނީ ސްކޫލްގެ ލައިބްރަރީއަށް ފޮތް ގަތުމަށްކަމަށްވެސް ސްކޫލްގެ އޮފިޝަލަކު ވިދާޅުވިއެވެ.
މިއީ އެތަކެތި ވިއްކައިގެން ލިބޭ ފައިސާއަށް ވުރެ ބޮޑަށް، ބޭނުންކޮށްފައި އުކާލެވޭ ތަކެތިން އެއްޗެތި ތައްޔާރުކުރުމުގެ ފިކުރު ޚާއްޞަކޮށް ސްކޫލްގެ ބެލެނިވެރިންގެ މެދުގައި އަދި ޢާއްމުކޮށް ހުރިހާ ރައްޔިތުންގެ މެދުގައި އާލާކުރުމަށް ކުރެވޭ މަސައްކަތެއް ކަމަށް ސްކޫލްގެ އިސްބޭފުޅުން މަޢުލޫމާތު ދެއްވައެވެ.
"އުއްމީދަކީ ޙިރާ ސްކޫލްގެ ކޮންމެ ދަރިވަރެއްގެ ގޭގައި މިގޮތަށް އުކާލެވޭ ތަކެތިން ބޭނުންތެރި، އުފެއްދުންތެރި، އާ ޚިޔާލު އެކުލެވޭ ތަކެތި ހަދައި ބޭނުންކުރެވިގެން ދިޔުން." ކަމަށާއި "އަދި އޭގެ ސަބަބުން އެހެން މައިންބަފައިންވެސް މިކަމުގެ ޚިޔާލާއި ޝައުޤުވެރިކަން އުފެއްދުމެވެ.
މި މައުރަޒުގައި ބޭނުންކޮށްފައި އުކާލާ ތަކެތިން އާ ތަކެތި އުފެއްދުމުގެ، އުފެއްދުންތެރި އާ ޚިޔާލުތަކެއް ލިބިގެންދާނެ ކަމަށްވެސް ސްކޫލުން މަޢުލޫމާތު ދެއްވައެވެ.
ވީހާވެސް ގިނަ ފަރާތްތަކުން މިއަދު މެންދުރު 14:00 އާއި 18:00 އާއި ދެމެދު ޒިޔާރަތްކުރެއްވުމަކީ އެސްކޫލްގެ ވަރަށްބޮޑު އެދުމެކެވެ.
ޤައުމީ މަންހަޖު ތަންފީޒު ކުރުމުގައި ބުރަ މަސައްކަތްތަކެއް ކުރަމުން އަންނަ ޙިރާ ސްކޫލަކީ ހިތަދޫގައި ޙިރާ ފައުންޑޭޝަނުން ހިންގާ ސްކޫލެކެވެ. އެސްކޫލުން ޤައުމީ މަންހަޖު ތަންފީޒު ކުރުމުގައި ހޯއްދަވާ ކާމިޔާބީ ތަޢުލީމީ ދާއިރާގެ ގިނަ މަސްއޫލުވެރިން ބަލައިގަންނަކަމީ އެސްކޫލަށް ލިބިފައިވާ އިތުރު ފުރިހަމަ ކަމެކެވެ.