އިޕްސިވިޗް ޓައުން 1-0 އިން ބަލިކޮށް އިނގިރޭސި ޕްރިމިއާ ލީގުގެ ދެވަނަ އަށް އާސެނަލް އަރައިފި އެވެ.
އާސެނަލް ދެވަނައިގައި އޮތީ 18 މެޗުން 36 ޕޮއިންޓު ހޯދައިގެންނެވެ. ތިންވަނައިގައި 18 މެޗުން 35 ޕޮއިންޓާ އެކު އޮތީ ޗެލްސީ އެވެ. އެއްވަނައިގައި 17 މެޗުން 42 ޕޮއިންޓާ އެކު އޮތީ ލިވަޕޫލް އެވެ.
އަމިއްލަ ދަނޑުގައި ކުޅުނު މެޗުގައި ފެނިގެންދިޔަ ހަމައެކަނި ގޯލު އާސެނަލަށް މެޗުގެ 23 ވަނަ މިނެޓްގައި ކާމިޔާބުކޮށްދިނީ ކައި ހަވެޓްޒް އެވެ. މިއީ ލިއަންޑްރޯ ޓްރޮސާޑް ނަގައިދިން ހުރަހަކުން ގޯލު ކުރިމަތީ ހުރެ ބޯޅަ ގޯލަށް ވައްދާލައިގެން ހަވެޓްޒް ކާމިޔާބުކުރި ގޯލެކެވެ.
މި ގޯލަށް ފަހު ލީޑު ފުޅާކޮށްލަން ވެސް އާސެނަލުން ރަނގަޅު ފުރުސަތުތަކެއް ތަނަވަސްކޮށްފައިވެ އެވެ. އެގޮތުން ގެބްރިއަލް އަށް މުޅިން ހުސް ފުރުސަތެއް ލިބުނުއިރު، އޭނާ ބޮލުން ފޮނުވާލި ހަމަލާ ދިޔައީ ގޯލާ އަމާޒު ނުވެ ބޭރަށެވެ. އަދި މާޓިން އޮޑެގާޑް އާއި ޑެކްލަން ރައިސް ފޮނުވާލި ހަމަލާތައް މަތަކުރީ އިޕްސިވިޗްގެ ގޯލް ކީޕަރެވެ.
އާސެނަލުން މި މެޗުގައި ކުޅުނީ އަނިޔާގެ ސަބަބުން އެޓީމުގެ އެންމެ މުހިއްމު އެއް ކުޅުންތެރިޔާ ކަމަށްވާ ބުކާޔޯ ސަކާއާ ނުލަ އެވެ. އަނިޔާގެ ސަބަބުން ސަކާ ގިނަ ދުވަސްތަކެއް ވަންދެން ކުޅުމާއި ދުރުގައި ހުންނަން ޖެހިފައިވާ ކަމަށް އާސެނަލްގެ ކޯޗު މިކޭލް އާޓެޓާ ވަނީ ބުނެފަ އެވެ.
ލީގުގައި އާސެނަލް ދެން ބައްދަލުކުރާނީ ބްރެންޓްފޯޑްއާ އެވެ.