ފިލަން ނޫޅޭ ކަމަށާއި ބިރުގަންނަންޖެހޭ ވަރުގެ ކަމެއް ނެތް ކަމަށް ރޯޑް ޑިވެލޮޕްމެންޓު ކޯޕަރޭޝަން (އާރްޑީސީ)ގެ ކުރީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ވިދާޅުވެއްޖެ އެވެ.
ކުރީ ސަރުކާރުގައި އާރްޑީސީގެ ތެރޭގައި ހިންގި ކަމަށް ބުނާ ހިޔާނާތުގެ މައްސަލައިގެ ތަހުގީގާއި ގުޅިގެން މޫކޭ އާއި އެ ކުންފުނީގެ ކުރީގެ ޗީފް ފައިނޭންޝަލް އޮފިސަރު މަގާމުގައި ހުރި ޔާސިރު ހަސަންގެ ޕާސްޕޯޓު ވަނީ ހިފަހައްޓާފަ އެވެ.
މިކަމާ ގުޅިގެން ރާއްޖެޓީވީގައި ރޭ ވާހަކަދައްކަމުން މޫކޭ ވިދާޅުވީ މި ޗުއްޓީގައި ތަނަކަށް ފުރަން ގަސްދުކޮށްގެން ވެސް ނެތް ކަމަށާއި ފިލަން ނޫޅޭ ކަމަށެވެ. އަދި މިފަދަ ކަންކަން ކޮށްގެން ބިރުގަނެފާނެ ކަމަށް ރައީސް ޑރ. މުހައްމަދު މުއިއްޒު ހީފުޅުކުރެއްވުމަކީ ކުށްހީއެއް ކަމަށްވެސް މޫކޭ ވިދާޅުވި އެވެ.
"ފިލުމުގެ ބޭނުމެއް ވެސް ނެތް. މިއީ މީހަކު ބިރުގަންނަންޖެހޭ ވަރުގެ ކަމެއް ނޫން،" މޫކޭ ވިދާޅުވި އެވެ.
މޫކޭ ވިދާޅުވީ ރައީސް މުއިއްޒަށް އެންމެ ބޮޑު ވަރަކަށް ކުރެވޭނެ ކަމަކީ ޖަލަށްލުން ކަމަށާއި ނަމަވެސް ހައްގު ކަމެއްގައި ޖަލަކަށް ވެސް ނުލެވޭނެ ކަމަށެވެ. އަދި އޭނާގެ މައްޗަށް ކުރެވުނު ތުހުމަތުތަކާއި ގުޅިގެން ޖަލަށް ނުލެވޭނެ ކަމަށާއި އިންސާފުން ކަމެއް ގެންދާނަމަ ކުރެވޭނެ ދައުވާއެއް ނުފެންނާނެ ކަމަށްވެސް ވިދާޅުވި އެވެ.
"އަޅުގަނޑަށް ކުރެވުނު ކަންކަން އެނގޭ. އަޅުގަނޑަށް ޖަވާބުދާރީނުވެވޭ ކަމެއް ނުކުރަން،" މޫކޭ ވިދާޅުވި އެވެ.
އާރްޑީސީގެ ހިޔާނާތުގެ ތަހުގީގާއި ގުޅިގެން މިދިޔަ ބުރާސްފަތި ދުވަހުގެރޭ ފުލުހުން ވަނީ މޫކޭ ދިރިއުޅޭ ތަނާއި ޔާސިރަށް ނިސްބަތްވާ ދެ ތަނެއް ބަލައި ފާސްކޮށްފަ އެވެ. އެ ތަންތަން ބަލައި ފާސްކުރުމުގެ އިތުރަށް، އިލެކްޓްރޯނިކް ސާމާނުތައް ވެސް ވަނީ ހިފަހައްޓާފަ އެވެ.
މީގެކުރިން ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނީ އާރުޑީސީއާ ގުޅޭ ހިޔާނާތުގެ ބޮޑު މައްސަލަ ތަހުގީގު ކުރަނީ އޭސީސީއާ ގުޅިގެން ކަމަށާއި 2022 ސެޕްޓެންބަރު މަހު ހުށަހެޅުނު މި މައްސަލާގައި އާރުޑީސީގެ ގިނަ މުވައްޒިފުންތަކެއް ބައިވެރިވެފައިވާ ކަމަށް މިހާތަނަށް ތަހުގީގަށް ފާހަގަ ކުރެވިފައިވާ ކަަމަށެވެ.
އެގޮތުން އާރުޑީސީގެ ތިން މީހެއްގެ އެކައުންޓަށް އެކި ފަހަރުމަތިން 14 މިލިއަނެއްހާ ރުފިޔާ ޖަމާކޮށްފައިވާ ކަމަށާއި އެކެއްގެ އެކައުންޓަށް 216 ޓްރާންސެކްޝަން ހަދާފައިވާ ކަމަށް ފުލުހުން ބުނެ އެވެ.
"އެއީ 11 މިލިއަން ރުފިޔާގެ ވާހަކަ މިދައްކަނީ. އެހެންވެ، ގިނަ ޓްރާންސެކްޝަންތަކެއްގެ ވާހަކަ މި ދެއްކެނީ. މިއީ ވަރަށް ގިނަ ބަޔަކު ބައިވެރިވާ ކަމެއް މިއީ،" ފުލުހުން ބުންޏެވެ.
ފުލުހުން ބުނީ އެ ތިން މީހުންގެ އެކައުންޓަށް ޖަމާކޮށްފައިވާ އެތައް މިލިއަން ރުފިޔާއެެއް އެހެން އެކައުންޓްތަކަށް ވެސް ފޮނުވާފައިވާ ކަމަށެވެ. މި ހިޔާނާތުގައި ގާތްގަނޑަކަށް 15 މީހަކު ބައިވެރިވާ ކަމަށްވެސް ފުލުހުން ވަނީ ބުނެފަ އެވެ.