"ހޮންޑާ ރާސް ޗެމްޕިއަންޝިޕް" ގެ ނަމުގައި މިދިޔަ ހުކުރު ދުވަވަހު ހުޅުމާލޭގައި ބާއްވަން އުޅުނު ރޭސިން މުބާރާތް ފުލުހުން ހުއްޓުވުމާއި ގުޅިގެން އެކަމަށް ހައްލެއް ހޯދުމުގެ މަސައްކަތް ސްޕޯޓްސް މިނިސްޓްރީން ފަށައިފި އެވެ.
މި މުބާރާތަކީ ރޭސިން އެސޯސިއޭޝަން އޮފް ދަ މޯލްޑިވްސް އިން އިންތިޒާމުކުރި މުބާރާތެކެވެ. މި މުބާރާތް ހުއްޓުވީ މުބާރާތް ބާއްވަން ކަމާބެހޭ ހުރިހާ ފަރާތްތަކާ ވެސް މަޝްވަރާކޮށްގެން އަނގަބަހުން ލިބުނު ހުއްދައާ އެކީ މުބާރާތް އިންތިޒާމުކޮށް، މުބާރާތް ފަށަން ކުޑަތަންވެފައި ވަނިކޮށް ކަމަށް އެ އެސޯސިއޭޝަނުން ބުނެ އެވެ.
އެގޮތުން އިވެންޓު ހުއްޓުވަން ދިޔަ ފުލުހުން އެންގީ ލިޔެކިޔުމަކުން ދީފައިވާ ހުއްދަ ނެތް ނަމަ އިވެންޓު ކުރިއަަށް ނުގެންދެވޭނެ ކަމަށްވެސް ބުނެފައިވެ އެވެ.
ސްޕޯޓްސް މިނިސްޓްރީން ބުނީ ރޭސިން އެސޯސިއޭޝަންގެ "ރާސް ޗެމްޕިއަންޝިޕް" ނުބޭއްވި މަޑު ޖައްސާލަން ޖެހުނުކަން، ކުޅިވަރު ވުޒާރާގެ ސަމާލުކަމަށް އައި ހިސާބުން ފެށިގެން، ކަމާ ގުޅުންހުރި މިނިސްޓްރީތަކާއި، އިދާރާތަކާއި ރޭސިން އެސޯސިއޭޝަންއާ ވާހަކަދައްކައި، އެކަމަށް ހައްލެއް ހޯދުމުގެ މަސައްކަތް ކުރަމުންދާ ކަމަށެވެ.
"ހޮންޑާ ރާސް ޗެމްޕިއަންޝިޕް" އަކީ ހޮންޑާ މޯލްޑިވްސް އިން އިންތިޒާމުކޮށްގެން ކާރާއި ސައިކަލުގެ 15 ކެޓަގަރީން 72 މީހުން ވާދަކުރާ ގޮތަށް ކުރިއަށްގެންދާ މުބާރާތެކެވެ.