ވެސްޓްހަމް ޔުނައިޓެޑް 5-0 އިން ބަލިކޮށް ލިވަޕޫލުން އިނގިރޭސި ޕްރިމިއާ ލީގުގެ އެއްވަނައިގައި އަށް ޕޮއިންޓުގެ ލީޑެއް ނަގައިފި އެވެ.
ލީގުގެ އެއްވަނައިގައި ލިވަޕޫލް މިހާރު އޮތީ 18 މެޗުން ލިބުނު 45 ޕޮއިންޓާ އެކު އެވެ. ދެވަނައިގައި 19 މެޗުން 7 ޕޮއިންޓު ހޯދައިގެން އޮތީ ނޮޓިންހަމް ފޮރެސްޓް އެވެ. ތިންވަނައިގައި 18 މެޗުން 36 ޕޮއިންޓާ އެކު އޮތީ އާސެނަލް އެވެ.
ވެސްޓްހަމްގެ ދަނޑުގައި ކުޅުނު މި މެޗުގެ ފުރަތަމަ ހާފް ލިވަޕޫލުން ނިންމާލީ ތިން ގޯލުގެ ލީޑަކާއެކު އެވެ. ލިވަޕޫލްގެ ފުރަތަމަ ގޯލު މެޗުގެ 30 ވަނަ މިނެޓްގައި ލުއިސް ޑިއާޒް ކާމިޔާބުކޮށްދިން އިރު، އެޓީމުގެ ދެވަނަ ގޯލު މެޗުގެ 40 ވަނަ މިނެޓްގައި ކާމިޔާބުކޮށްދިނީ ކޯޑީ ގަކްޕޯ އެވެ. އަދި އޭގެ ހަތަރު މިނެޓް ފަހުން މުހައްމަދު ސަލާ ވަނީ ލިވަޕޫލްގެ ލީޑު ފުޅާކޮށްދީފަ އެވެ.
ދެވަނަ ހާފުގައި، ޓްރެންޓް އެލެގްޒެންޑާ އާނޯލްޑްގެ ގޯލުން ލިވަޕޫލުން ހަތަރު ވަނަ ގޯލު ޖެހިިއިރު، ސަލާހު ހުސްކޮށްލާފައި ދިން ބޯޅައަކުން ލިވަޕޫލްގެ ފަސްވަނަ ގޯލު ކާމިޔާބުކޮށްދިނީ ޑިއޯޯގޯ ޖޮޓާ އެވެ.
މިއީ ލީގުގައި ލިވަޕޫލުން ޖެހިޖެހިގެން ހޯދި ތިންވަނަ މޮޅު ކަމަށްވާއިރު، ލީގުގައި އެޓީމު ދެން އަމިއްލަ ދަނޑުގައި ބައްދަލުކުރާނީ މެންޗެސްޓާ ޔުނައިޓެޑާ އެވެ.