ބަންދުކޮށްފައި އޮންނަތާ ގިނަ ދުވަސްތަކެއްވީ އައްޑޫ ޝަންގްރިއްލާ ރިސޯޓް މި އަހަރު ނިމުމުގެ ކުރިން ހުޅުވާނެ ކަމަށް މި ސަރުކާރުންވި ވައުދު ފުއްދައި ނުދެވި އަހަރު ނިންމާލަން ގާތްވެއްޖެ އެވެ.
މާދަމަ އަކީ އަހަރުގެ ފަހު ދުވަހެވެ. މި ސަރުކާރުން އެތައް ފަހަރެއްގެ މަތިން ވަނީ އަހަރު ނިމުމުގެ ކުރިން ޝަންގްރިއްލާ އަލުން އޮޕަރޭޝަނަށް ގެންނާނަމުގެ ޔަގިންކަން ދީފަ އެވެ. އެގޮތުން ރައީސް ޑޜ. މުހައްމަދު މުއިއްޒާއި ޓޫރިޒަމް މިނިސްޓަރު އިބްރާހީމް ފައިސަލް ވެސް އެ ވާހަކަ އެތައް ޕްލެޓްފޯމެއްގައި ދައްކަވާފައިވެ އެވެ.
ނަމަވެސް އައްޑޫގެ މިހާރުގެ އެންމެ ބޮޑު ކަންބޮޑުވުންތަކުގެ ތެރޭގައި ހިމެނޭ ޝަންގްރިއްލާ ރިސޯޓް އަލުން އޮޕަރޭޝަނަށް ގެނެސް ނުދެވި އަހަރު ނިންމައިލާ އިރު، ސަރުކާރުގެ އެ ވައުދުގެ ވާހަކަ ވަރަށް ގިނަ ބަޔަކު މިހާރު އަންނަނީ ސޯޝަލް މީޑިއާގައި ވެސް ހިއްސާކުރަމުންނެވެ.
ރާއްޖޭގެ އެންމެ މަތީ ފަންތީގެ ރިސޯޓްތަކުގެ ތެރޭގައި ހިމެނުނު 2008 ގައި ހުޅުވި ޝަންގްރިއްލާ ބަންދުކުރީ 2020 ގަ އެވެ. އެއީ ކޮވިޑްގެ ވަބާގެ ތެރޭގައި އެ އަހަރުގެ ޖުލައިގަ އެވެ. ނަމަވެސް އެތަން ނުޙުޅުވި ގިނަ ދުވަސްތަކެއްވެގެން ގޮސްފައިވާ އިރު، މިދިޔަ ސަރުކާރުން ވެސް ޝަންގްރިއްލާ އަލުން އޮޕަރޭޝަނަށް ގެންނާނެކަމުގެ އެތައް ވާހަކަތަކެއް ދެއްކެވި އެވެ.
ނަމަވެސް ސަރުކާރު ބަދަލުވި އެކަން ނުވެ އޮއްވަ އެވެ.
އެހެންވެ މިި ސަރުކާރުން ވެސް ޝަންގްރިއްލާގެ ވާހަކަ ވަރަށް ބާރަށް ދެއްކި އެވެ. އެ ރިސޯޓް އަލުން އޮޕަރޭޝަނެއް ގެނެވޭތޯ ކުރެވެން ހުރި ކަންކަން ކުރަން މި އަހަރުގެ ފެބްރުއަރީ މަހުގެ ތެރޭގައި އިިކޮނޮމިކް ކައުންސިލަށް ވެސް އެކަން ހުށަހެޅި އެވެ. އަދި ޝަންގްރިއްލާ ހުޅުވުމާ ގުޅޭ ކަންކަން ކުރަން ޖުލައި މަހުގެ ތެރޭގައި ހާއްސަ ޓާސްކް ފޯހެއް ވެސް އެކުލަވާލައި މަސައްކަތްތަކެއް ކުރި އެވެ.
އެ މަހުގެ ތެރޭގައި ރައީސް ވަނީ ޑިސެމްބަރުގެ ތެރޭގައި އެ ރިސޯޓް ހުޅުވޭ ގޮތް ހަދަން އަންގަވައިފަ އެވެ.
ޝަންގްރިއްލާ އަލުން އޮޕަރޭޝަނަށް ގެނައުމާ ގޮތުން މިނިސްޓަރު ފައިސަލް އެންމެ ފަހުން ވާހަކަ ދެއްކެވީ މިދިޔަ އޮކްޓޯބަރު މަހުގެ ތެރޭގަ އެވެ. އެގޮތުން އެ މަހުގެ 23 ވަނަ ދުވަހުގެ ޖަލްސާގައި މިނިސްޓަރު ފައިސަލްއާ ސުވާލު ކުރުމަށް ލިބުނު ފުރުސަތުގައި ހިތަދޫ ދެކުނު ދާއިރާ އިބްރާޙިމް ނާޒިލް ވަނީ، ޝަންގްރިއްލާ ހަ މަސް ތެރޭ ހުޅުވުމަކީ ރައީސް ޑރ. މުހައްމަދު މުއިއްޒުގެ ވައުދެއްކަން ފާހަގަކޮށް އެކަމުގެ އަޕްޑޭޓަކީ ކޮބައިތޯ ސުވާލު ކުރައްވާފަ އެެވެ.
ޖަވާބުގައި މިނިސްޓަރު ވިދާޅުވެފައި ވަނީ ޝަންގްރިއްލާގެ މައްސަލައަކީ އައްޑޫގެ ޓޫރިޒަމަށް އޮތް އެންމެ ބޮޑު ގޮންޖެހުން ކަމަށްވާތީ ގާނޫނު އިސްލާހުކޮށްގެން ނަމަވެސް އެ ރިސޯޓް އަލުުން އޮޕަރޭޝަނަށް ގެންނާނެ ކަމަށެވެ.
ޝަންގްރިއްލާ ވިލިގިލި ރިސޯޓަކީ ސަރުކާރުގެ 30 ޕަސެންޓް ހިއްސާ އާއި އައްޑޫ އިންވެސްޓްމެންޓް ޕްރައިވެޓް ލިމިޓެޑްގެ 70 ޕަސެންޓް ހިއްސާއާ އެކީ ތަރައްގީކުރި ރިސޯޓެއް ނަމަވެސް މިދިޔަ އޮގަސްޓު މަހުގެ ތެރޭގައި ވަނީ އެ ރިސޯޓުގައި އޮތް ސަރުކާރުގެ 30 ޕަސެންޓް ހިއްސާ ދޫކޮށްލައިފަ އެވެ. އެކަން އެގޮތަށް ކުރީ ވެސް އެތަން އަލުން އޮޕަރޭޝަން ގެނައުން އަވަސްކުރުމަށް ކަމަށް ބުނެ އެވެ.
ނަމަވެސް ޝަންގްރިއްލާ ރިސޯޓް އަލުން އޮޕަރޭޝަނަށް ގެނައުން މިއޮތީ ބިލާހެއްގެ ގޮތުގަ އެވެ.
އެތަން ބަންދުކުރުމާ ގުޅިގެން އެތައް ބައެއްގެ ވަޒީފާ ވެސް ގެއްލި، އައްޑޫގެ އިގުތިސާދަށް އެކަމުގެ ނޭދެވޭ އަސަރު ވެސް ބޮޑަށް ކޮށްފައިވެ އެވެ.