އިނގިރޭސި ޕްރިމިއާ ލީގުގައި ރޭ އިޕްސިވިޗް ޓައުން އަތުން 2-0 އިން ޗެލްސީ ބަލިވިއިރު، ނިއުކާސަލް ޔުނައިޓެޑް އަތުން 2-0 އިން މެންޗެސްޓާ ޔުނައިޓެޑް ބަލިވެއްޖެ އެވެ.
މިއީ ލީގުގައި ޔުނައިޓެޑުން ޖެހިޖެހިގެން ބަލިވި ތިންވަނަ މެޗު ކަމަށްވާއިރު، މިއީ ޗެލްސީން ލީގުގައި ޖެހިޖެހިގެން ބަލިވި ދެވަނަ މެޗެވެ. އަދި މިއީ އިޕްސިވިޗް ޓައުން އިން ލީގުގައި ހޯދި ތިންވަނަ މޮޅެވެ.
މި ނަތީޖާއާއެކު ޗެލްސީ މިހާރު އޮތީ 19 މެޗުން 35 ޕޮއިންޓާ އެކު ލީގުގެ ހަތަރުވަނައިގަ އެވެ. ޔުނައިޓެޑް އޮތީ 19 މެޗުން ލިބުނު 22 ޕޮއިންޓާ އެކު ލީގުގެ 14 ވަނައިގަ އެވެ.
އަމިއްލަ ދަނޑުގައި ކުޅުނު މެޗުގެ 12 ވަނަ މިނެޓްގައި ލިބުނު ޕެނަލްޓީއަކުން ލިއާމް ޑެލަޕް ވަނީ އިޕްސިވިޗަށް ލީޑު ނަގައިދީފަ އެވެ. ފުރަތަމަ ހާފް ނިމުމުގެ ކުރިން ނަތީޖާ އެއްވަރުކޮށްލަން ޗެލްސީން ރަނގަޅު ފުރުސަތުތަކެއް ތަނަވަސްކުރި އެވެ. އެގޮތުން ކޯލް ޕާމާ ފޮނުވާލި ފޮނުވާލި އެއް ހަމަލާ ގޯލުގެ ދަނޑި އަށް އަމާޒުވިއިރު، އޭނާ ފޮނުވާލި އިތުރު ހަމަލާއެއް އިޕްސިވިޗްގެ ކީޕަރު ވަނީ މަތަކޮށްފަ އެވެ.
އިޕްސިވިޗްގެ ދެވަނަ ގޯލު މެޗުގެ 53 ވަނަ މިނެޓްގައި ކާމިޔާބުކޮށްދިނީ ޗެލްސީ އަށް ކުރިން ކުޅުނު އޮމާރީ ހަޗިންސަން އެވެ. މި ހާފުގައި ޗެލްސީ އަށް މާ ރަނގަޅު ފުރުސަތުތަކެއް ތަނަވަސްކުރެވިފައެއް ނުވެ އެވެ.
ޔުނައިޓެޑްގެ ދަނޑުގައި ކުޅުނު މެޗުގައި ނިއުކާސަލުން ކާމިޔާބުކުރި ދެ ގޯލު ވެސް ފެނިގެންދިޔައީ ފުރަތަމަ ހާފްގަ އެވެ. އެގޮތުން މެޗުގެ ހަތަރުވަނަ މިނެޓްގައި އެލެގްޒެންޑާ އިސާކް ނިއުކާސަލްގެ ފުރަތަމަ ގޯލު ކާމިޔާބުކޮށްދިނީ ޔުނައިޓެޑްގެ އޭރިއާ ތެރެއަށް ހުރަސްކޮށްލި ބޯޅައެއް މުޅިން ހުހަށް ހުރެ ބޮލުން ކުރިއަށް ފޮނުވާލައިގެންނެވެ. އަދި މެޗުގެ 19 ވަނަ މިނެޓްގައި ނިއުކާސަލްގެ ދެވަނަ ގޯލު ޖޮއެލިންޓަން ވެސް ގޯލު ކާމިޔާބުކުރީ ޔުނައިޓެޑްގެ އޭރިއާ ތެރެއަށް ހުރަސްކޮށްލި ބޯޅައަކުންނެވެ.
މި ދެ ގޯލަށްފަހު ވެސް ނިއުކާސަލަށް ފުރަތަމަ ހާފުގައި ގޯލުޖަހާނެ ރަނގަޅު އިތުރު ފުރުސަތުތަކެއް ވަނީ ލިބިގެން ގޮސްފަ އެވެ. ފުރަތަމަ ހާފް ނިމުމުގެ ކުރިން ޔުނައިޓެޑްގެ މިޑްފީލްޑަރު ކަސެމީރޯ އަށް ނަތީޖާގެ ފަރަގު ކުޑަކޮށްލަން މުޅިން ހުސް ފުރުސަތެއް ލިބި ބޭކާރުވިއިރު، ދެވަނަ ހާފުގައި ވެސް ރަނގަޅު ފުރުސަތުތަކެއް ޔުނައިޓެޑަށް ލިބިފައިވެ އެވެ.
މި މޮޅާއެކު ނިއުކާސަލުން މިހާރު ވަނީ ލީގުގެ ހަތަރުވަނަ މަގާމާއި ހަތަރު ޕޮއިންޓާއި ގާތަށް ޖެހިލާފަ އެވެ. ނިއުކާސަލް އޮތީ 19 މެޗުން 32 ޕޮއިންޓު ހޯދައިގެން ލީގުގެ ފަސްވަނައިގަ އެވެ.