އާސެނަލުން މި އަހަރު ކުޅުނު ފުރަތަމަ މެޗުގައި ރޭ ބްރެންޓްފޯޑް އަތުން 3-1 އިން މޮޅުވެއްޖެ އެވެ.
މި މޮޅާއެކު އާސެނަލް އޮތީ 19 މެޗުން 39 ޕޮއިންޓު ހޯދައިގެން އިނގިރޭސި ޕްރިމިއާ ލީގުގެ ދެވަނައިގަ އެވެ. އެއްވަނައިގައި އާސެނަލަށް ވުރެ އެއް މެޗު މަދުން ކުޅެގެން 45 ޕޮއިންޓާ އެކު އޮތީ ލިވަޕޫލް އެވެ. ލީގުގެ ތިންވަނައިގައި 19 މެޗުން 37 ޕޮއިންޓާއެކު އޮތީ ނޮޓިންހަމް ފޮރެސްޓް އެވެ.
އަމިއްލަ ދަނޑުގައި ކުޅުނު މި މެޗުގެ 13 ވަނަ މިނެޓްގައި ބްރަޔަން އެމްބުއޭމޯ ވަނީ ބްރެންޓްފޯޑަށް ލީޑު ނަގައިދީފަ އެވެ. އެމްބުއޭމޯ މި ގޯލު ކާމިޔާބު ކުރީ އާސެނަލްގެ އޭރިއާ ތެރެއަށް ވަދެ ފޮނުވާލި ހަމަލާއަކުންނެވެ. ނަމަވެސް މެޗުގެ 29 ވަނަ މިނެޓްގައި ގެބްރިއަލް ޖޭސުސް ވަނީ އާސެނަލަށް ނަތީޖާ އެއްވަރުކޮށްދީފަ އެވެ.
ދެ ޓީމު އެއްވަރެއްގައި އޮވެ ފުރަތަމަ ހާފް ނިމުނުއިރު، ދެވަނަ ހާފްގެ ކުރީކޮޅު އާސެނަލުން ވަނީ ދެ ގޯލު ކާމިޔާބުކޮށް ނަތީޖާ އަނބުރާލާފަ އެވެ. އެގޮތުން މެޗުގެ 50 ވަނަ މިނެޓްގައި އާސެނަލްގެ ދެވަނަ ގޯލު ކާމިޔާބުކޮށްދިނީ އެޓީމުގެ ސްޕެއިން މިޑްފީލްޑަރު މިކޭލް މޮރޭނޯ އެވެ. އަދި އޭގެ ތިން މިނެޓް ފަހުން ގެބްރިއަލް މާޓިނެއްލީ ވަނީ އާސެނަލްގެ ތިންވަނަ ގޯލު ކާމިޔާބުކޮށްދީފަ އެވެ.
މިއީ ލީގުގައި އާސެނަލުން ޖެހިޖެހިގެން ހޯދި ތިންވަނަ މޮޅެވެ.
އިނގިރޭސި ޕްރިމިއާ ލީގުގައި އާސެނަލް ދެން ބައްދަލުކުރާނީ ބްރައިޓަންއާ އެވެ.