ސަރުކާރަށް ޑިޖިޓަލް ސާވިސް ސްޕެޝަލިސްޓަކު ހޯދަން އިއުލާންކޮށްފިއެވެ. ހޯމް މިނިސްޓްރީގެ ދަށުން ހިންގަމުން އަންނަ ނެޝަނަލް ސެންޓަ ފޮ އިންފޮމޭޝަން ޓެކްނޮލޮޖީ (އެންސީއައިޓީ) އަށް ޑިޖިޓަލް ސާވިސް ސްޕެޝަލިސްޓަކު ހޯދަން އިއުލާންކޮށްފި އެވެ.
އެ މަގާމަށް ޝައުގުވެރިވާ ފަރާތްތަކަށް އެޕްލައި ކުރުމުގެ ފުރުސަތު ހުޅުވާލާފައި ވަނީ މި މަހުުގެ 20 އާ ހަމައަށެވެ.
ޑިޖިޓަލް ސާވިސް ސްޕެޝަލިސްޓްގެ މުސާރަ އަށް މަހަކު 25،300-36،000ރ. އާ ދެމެދުގެ މުސާރައެއް ލިބޭނެ އެވެ. މުސާރަ ކަނޑައަޅާނީ ތަޖުރިބާ އާއި ތައުލީމީ ފެންވަރަށް ބެލުމަށް ފަހު އެވެ.
ޑިޖިޓަލް ސާވިސް ސްޕެޝަލިސްޓްގެ ޒިންމާތަކުގެ ތެރޭގައި ހޯމް މިނިސްޓްރީ މެދުވެރިކޮށް އެންސީއައިޓީން ކުރިއަށް ގެންދާ ޑިޖިޓަލް ޑިވެލޮޕްމަންޓް އެކްޝަން ޕްލޭން ތަންފީޒު ކުރަމުން އަންނަނީ ސަރުކާރުގެ ނޭޝަނަލް ރެސިލިއެންސް އެންޑް ރިކަވަރީ (އެންއާރް) ޕްލޭމާއި އެއްގޮތައްތޯ ބެލުން ހިމެނެއެވެ. އަދި އެންސީއައިޓީގެ ތެރޭގައި ޕްރޮޖެކްޓް މެނޭޖްމަންޓް ޔުނިޓް (ޕީއެމްޔޫ) ސެޓަޕް ކުރުމާއި، އެ ޔުނިޓްގެ މަސައްކަތްތައް މިނިސްޓަރަށް ރިޕޯޓް ކުރުމާއި މިނިސްޓަރުގެ އިރުޝާދުގެ ދަށުން މަސައްކަތް ކުރުން ހިމެނެއެވެ.
މީގެ އިތުރުން ޖީޑީއެސްގެ މަސައްކަތްތައް ފަރުމާކުރުމާއި ތަންފީޒުކުރުމާއި ހިންގުމުގެ އިންތިޒާމުތަކަށް އެހީތެރިކަން ފޯރުކޮށް ދިނުމާއި އެންމެ ރަނގަޅު އުސޫލުތަކާއި ލަފާތަކާ އެއްގޮތަށް މަސައްކަތްތައް ހިންގަމުން ދާކަން ކަށަވަރު ކުރުމަކީ ވެސް ޑިޖިޓަލް ސާވިސް ސްޕެޝަލިސްޓްގެ ޒިންމާއެކެވެ.
ހަމައެއާ އެކީ ތަންފީޒުކުރުމުގައި ހުރި މައްސަލަތައް ދެނެގަނެ ހައްލުކުރުމާއި ޕްރޮޖެކްޓް ކޯޑިނޭޓަރަށް އެހީތެރިވުމަކީ ވެސް ޒިންމާތަކުގެ ތެރޭގައި ހިމެނެ އެވެ.