މި ސަރުކާރާ އެކު ސަރުކާރާއި ކުންފުނިތަކުގައި ވެސް ވައްކަމާއި ހިޔާނާތް އިތުރުވެ، މިހާރު މުޅި ރާއްޖެ ވައްކަމުގެ ހާއްޔަކަށްވެފައިވާ ކަމަށް ދިއްދޫ ދާއިރާގެ ކުރީގެ މަޖިލިސް މެމްބަރު އަބްދުﷲ ވަހީދު ވިދާޅުވެއްޖެ އެވެ.
ރާއްޖެ ޓީވީން ގެނެެސްދިން "2024 ކުރުކޮށް" ޕްރޮގްރާމުގައި އޭނަ ވިދާޅުވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ކުރެއްވި ކެމްޕޭނުގައި އެންމެ ގިނައި ދެއްކެވި ވާހަކަ އަކީ ވައްކަމާއި ހިޔާނާތާއި ކަރަޕްޝަން މި ގައުމުން ނައްތާލާނެ ކަމުގެ ވާހަކަތައް ކަމަށެވެ. ނަމަވެސް ވެރިކަމަށް ވަޑައިގަތުމާ އެކީ ކަންކަތައް ވެގެން ދިޔައީ މުޅިން އިދިކޮޅަށް ކަމަށް ވަހީދު ވިދާޅުވި އެވެ.
އޭގެ ނަތީޖާއެއްގެ ގޮތުން މުޅި ގައުމު މިހާރު ވައްކަމުގެ ހާއްޔަކަށް ބަދަލުވެފައިވާ ކަމަށާއި ގައުމުގެ މިހާރު ހާލަތާ މެދު ވިސްނާލާ އިރު، ސިފަވެގެން ދަނީ ރައީސަށް ވައްކަން ވަރިހަމަވެފައިވާ ކަހަލަ ގޮތަކަށް ކަމަށް ވިދާޅުވި އެވެ.
ވަހީދު ވިދާޅުވީ ސަރުކާރުގެ އެއްވެސް މުއައްސަސާއަކަށް އަދި އެތަން ތަނުގެ އެމްޑީންނަކަށް ވެރިމީހާގެ ބައިވެރިވުމެއް ނެތި މިހާރު ރާއްޖޭގައި ހިނގަމުން މިދާ ބޮޑެތި ވައްކަމުގައި ބައިވެރިވާން ނުކެރޭނެ ކަމަށެވެ. އެހެންވެ ފެންމަތިވަމުންދާ ބޮޑެތި ހުރިހާ ވައްކަމެއްވެސް ހިނގަމުން ދަނީ ރައީސަށް ވަރަށް ރަނގަޅަށް އެގިހުންނަވައި، އެމަނިކުފާނުގެ ފަހުބަހާ އެކު ކަމަށް ވެސް ވިދާޅުވި އެވެ.
އެހެމްވެ ހުރިހާ ކުންފުނިތަކަކުން ވެސް ވައްކަން ކުރަމުން ގެންދާކަމަށް ވަހީދު ވިދާޅުވި އެވެ.
"އަޅުގަނޑު ހައިރާންވެ، އަޖައިބުވާ ކަމަކަށް މި ދިމާވީ ވައްކަމުގެ ހާއްޔެއްގެ ގޮތުގައި ކުންފުނިތައް އެކަންޏެއް ނޫން، ދިވެހި ރާއްޖެ ވެސް ބަދަލުވެގެން މިދަނީ ވައްކަމުގެ ހާއްޔަކަށް." އޭނަ ވިދާޅުވި އެވެ.
ވަހީދު ވިދާޅުވީ ބޮޑެތި ވައްކަންތައް އާންމުވެ، ގައުމުގެ ހާލަތު ގޯސްވެ، ރައްޔިތުން ކަންބޮޑުވާ ދަރަޖައަށް ގައުމުގެ ހާލަތަު ވެއްޓި، ރައްޔިތުން ތިބީ ދަތިހާލުގައި ކަމަށެވެ.