މާލެ ސަރަހައްދުގައި ފެން އުފައްދާ މިންވަރު ދެ ގުނަކުރަން އަމާޒު ހިފައފި އެވެ.
އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު ދައުލަތުގެ މީޑިއާ، ޕީއެސްއެމްގައި ވިދާޅުވީ މާލެ އާއި ހުޅުމާލޭގައި ފެން އުފައްދާ އިތުރު ޕްލާންޓްތަކެއްގެ މަސައްކަތް ފެށުމަށް ވެސް މިހާރު ތައްޔާރުވެފައިވާ ކަމަށެވެ.
އޭނަ ވިދާޅުވީ މާލެ އާއި ހުޅުމާލެ އަށް ވެސް ހޯދަނީ 5،000 ޓަނުގެ ޕްލާންޓްތަކެއް ކަމަށެވެ.
މަތީން ވިދާޅުވީ މި މަޝްރޫއު މި އަހަރު ފުރިހަމަ ކުރުމަކީ އަމާޒެއް ކަމަށާއި މިއާ އެކީ މާލޭގައި ފެން އުފައްދާ ކެޕޭސިޓީއަށް އިތުރު 30 ޕަސެންޓް އިތުރު ކުރެވޭނެ ކަމަށެވެ.
މާލެ ސަރަހައްދުގައި ފެނުގެ ހިދުމަތް ދިނުމަށް މިހާރު ގާއިމުކޮށްފައިވާ ޕްލާންޓްތަކުން މިހާރު ދުވާލަކު 20،000 ޓަނުގެ ފެން އުފައްދަ އެވެ.
މާލެ ސަރަހައްދުގައި ފެން އުފައްދާ ކެޕޭސިޓީ އިތުރުކުރާ އިރު ސިނަމާލެ ބްރިޖް ،މެދުވެރިކޮށް ހޮޅި އަޅައި މާލެ އާއި ހުޅުމާލޭގެ ފެނުގެ ވިއުގަ ގުޅާލުމުގެ މަސައްކަތް ވެސް އަންނަނީ ކުރަމުންނެވެ. މި ވިއުގަނިމުމުން ގަޑިއަކު 800 ޓަނުގެ ފެން މާލެ އާއި ހުޅުމާލެ ދެމެދު ފޯރުކޮށް ދެވޭނެ އެވެ.