މޫސުމީ ބަދަލުތަކުގެ އަގު ރާއްޖޭން ވަނީ އަދާކުރަން ޖެހިފައި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އިއްޔެ މާލެ އަށް ކުރި ގަދަ ވިއްސާރައިގެ ވީޑީއޯއަކާއެކު އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ މޫސުމަށް އަންނަ ބަދަލާއެކު ދުނިޔެ ހޫނުވަމުންދާނަމަ އިއްޔެ މާލެއިން ފެނުނު މަންޒަރު ތަކުރާރުކޮށް ފެންނަމުންދާނެ ކަމަށެވެ. އަދި ތިމާވެއްޓަށް އަންނަ ބަދަލުތަކުން އަރައިގަތުމަށް ލޮސް އެންޑް ޑެމޭޖު ފަންޑު ލިބިދާނެ ކަމަށް ރާއްޖެއިން އުއްމީދުކޮށްގެން ނުވާނެ ކަމަށްވެސް ނަޝީދު ވިދާޅުވި އެވެ.
"މިކަން މެދުވެރިވުމުގައި ދިވެހިންގެ އެއްވެސް ބައިވެރިވުމެއް ނެތް، އެކަމަކު ރާއްޖެއަށް މިވަނީ މިކަމުގެ އަގު އަދާކުރަން ޖެހިފައި. މިއީ މޫސުމަށް އަންނަ ބަދަލުތަކުގެ ނާއިންސާފުކަން،" ނަޝީދު ވިދާޅުވި އެވެ.
Bad floods in Male’ today. If we continue to heat the planet we will see more of these. Maldives cannot expect any Loss and Damage funds. We had no part in causing this but have to pay for it. That is the injustice of climate change. pic.twitter.com/Wo0wGPnFUy
— Mohamed Nasheed (@MohamedNasheed) January 4, 2025
މާލެއަށް އިއްޔެ ކުރި ގަދަ ވިއްސާރައިގެ ސަބަބުން 226 މީހަކަށް ވަގުތީ ބޯހިޔާވަހިކަމާއި ކެއުންބުއިމުގެ އެހީތެރިކަން ފޯރުކޮށްދީފައިވާ ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން ވަނީ ބުނެފަ އެވެ.
މި ވިއްސާރައިގައި އެންމެ ބޮޑު ގެއްލުމެއް ލިބުނީ ފ. ނިލަންދޫ އަދި ކ. ހިންމަފުއްޓަށް އެންޑީއެމްއޭ އިން ބުނެ އެވެ. އެގޮތުން ނިލަންދޫގެ 80 ޕަސެންޓުގައި ފެން ބޮޑުވިއިރު ހިންމަފުށީގެ 60 ޕަސެންޓަށް ފެން ބޮޑުވި އެވެ. އަދި ކ. ގުރައިދޫގެ 60 ގެއަކަށް އެކި ވަރުގެ ގެއްލުންތައް ލިބިފައިވާ ކަމަށް އެންޑީއެމްއޭ އިން ބުންޏެވެ.
މީގެއިތުރުން ވިއްސާރައިގައި ށ.ނަރުދޫ އާއި ރ. އިނގުރައިދޫ އަށް އުދަ އަރައި ގެއްލުންތަކެއް ލިބިފައިވެ އެވެ.
ރާއްޖެ އަށް މޫސުން ގޯސްވެފައި ވަނީ ސްރީ ލަންކާގެ އިރުދެކުނުގައި އުފެދިފައިވާ ކޮޅިގަނޑާއި، އެ ކޮޅިގަނޑާއި ގުޅިފައިވާ ގުޅިފައިވާ ލޯ ޕްރެޝާ ޓްރަފުގެ ސަބަބުން ކަމަށް މެޓް އޮފީހުން ބުނެ އެވެ.