އެމެރިކާގެ އިންޓަ މަޔާމީ އަށް ކުޅެމުން އަންނަ އާޖެންޓީނާގެ ލެޖެންޑް، ލިއޮނަލް މެސީގެ އަގުވަޒަންކުރުމުގެ ގޮތުން އެމެރިކާ ސަރުކާރުގެ ފަރާތުން ހާއްސަ މެޑެއްޔެއް ދީފި އެވެ.
އިއްޔެ ވައިޓް ހައުސްގައި ބޭއްވި ރަސްމިއްޔާތެއްގައި އެމެރިކާ ސަރުކާރުގެ ފަރާތުން މެސީ އަށް ދީފައިވަނީ "ޕްރެޒިޑެންޝިއަލް މެޑަލް އޮފް ފްރީޑަމް" އެވެ. މިއީ އެމެރިކާގައި ދޭ މަދަނީ އެންމެ ޝަރަފްވެރި ލަގަބެވެ. މެސީގެ އިތުރުން މި މެޑަލް އިތުރު 19 ފަރާތަކަށް އަރުވާފައިވެ އެވެ. އެ ފަރާތްތަކަށް މެޑަލް ހަވާލުކޮށްދިނީ އެމެރިކާގެ ރައީސް ޖޯ ބައިޑެން އެވެ.
މެޑަލް ދިނުމަށް ބޭއްވި ރަސްމިއްޔާތުގައި މެސީ ބައިވެރިވެފައި ނުވާއިރު، މިފަދަ ޝަރަފެއް ލިބުނީތީ އެކަމާ ފަހުރުވެރިވާ ކަމަށް މެސީ ވަނީ ބުނެފަ އެވެ. އަދި ކައިރި މުސްތަގުބަލެއްގައި ބައިޑެންއާ ބައްދަލުވާނެ ކަމަށް އުއްމީދު ކުރާ ކަމަށް މެސީ ބުންޏެވެ.
ވައިޓް ހައުސް އިން ނެރުނު ބަޔާނެއްގައި ބުނީ މެސީ ،37، އަށް މި މެޑަލް ދީފައިވަނީ ލިއޯ މެސީ ފައުންޑޭޝަނާއި ޔުނިސެފްގެ ގުޑްވިލް އެމްބެސެޑަރުގެ ހައިސިއްޔަތުން ސިއްހީ އަދި ތައުލީމީ ދާއިރާ އަށް ފޯރުކޮށްދީފައިވާ އެހީތައް ފާހަގަކުރުމުގެ ގޮތުންނެވެ.
ދުނިޔޭގެ އެންމެ މޮޅު އެއް ފުޓްބޯޅަ ކުޅުންތެރިއާގެ ގޮތުގައި ފާހަގަކުރެވިފައިވާ މެސީ ވަނީ އޭނާގެ ކެރިއަރުގައި މިހާތަނަށް 45 ތަށި ހޯދާފަ އެވެ. އެގޮތުން އިންޓަ މަޔާމީގެ ތާރީހުގައި އެޓީމަށް ފުރަތަމަ ފަހަރަށް ލީގު ހޯދައިދިނުމުގައި މެސީ މުހިއްމު ދައުރެއް އަދާކޮށްފައިވާއިރު، މިދިޔަ ސީޒަނުގެ އެމެރިކާ ލީގުގެ އެންމެ މޮޅު ކުޅުންތެރިއަކީ ވެސް މެސީ އެވެ.
އާޖެންޓީނާއެކު ވޯލްޑް ކަޕް ހޯދާފައިވާ، މެސީ ވަނީ އެންމެ މޮޅު ފުޓްބޯޅަ ކުޅުންތެރިޔާއަށް ދޭ، ބެލޮންޑިއޯ އެވޯޑު 8 ފަހަރެއްގެ މަތިން ކާމިޔާބުކޮށްފަ އެވެ.