މި ސަރުކާރުގެ އެންމެ ބިޔަ މަޝްރޫއު، ރަސްމާލެ މަޝްރޫއުގެ ދުވެލި ތިންގުނަ އަވަސް ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ކ. ގުޅީ ރައްޔިތުންނާއެކު މިއަދު ހަވީރު ބޭއްވި ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ ރަސްމާލެ މަޝްރޫއު އަކީ ރާއްޖޭގެ ބޯހިޔާވަހިކަމުގެ މައްސަލަ އަށް އެއް ސަރަހައްދުން އެންމެ ބޮޑު ހައްލު އަންނާނެ އެއް މަޝްރޫއު ކަމަށާއި އެއީ އެއްފަސްގަނޑެއްގައި އެންމެ ގިނަ މީހުން އާބާދުވާނެ އެންމެ ބޮޑު މަޝްރޫއު ކަމަށެވެ.
އެ މަޝްރޫއުގެ ބިން ހިއްކުމުގެ މަސައްކަތް އަމަލީގޮތުން ފެށިގެން ކުރިއަށްދާއިރު، އިތުރު ކުންފުނިތަކުގެ ޑްރެޖަރުތައް އެ ސަރަހައްދަށް މޮބިލައިޒްކޮށް، އެއް ފަހަރާ ގިނަ މަސައްކަތްތަކެއް ފެށުމަށް މަސައްކަތް ކުރަމުންދާ ކަމަށް ރައީސް ވިދާޅުވި އެވެ.
"އެހެންވީމާ، ސްޕީޑު ދެގުނަ އަދި ތިންގުނަ އަށް ބާރުވާނެ،" ރައީސް ވިދާޅުވި އެވެ.
ރައީސް ވިދާޅުވީ މިދިޔަ އަހަރުތެރޭގައި އެ މަޝްރޫއު އެންމެ ބޭނުންވި ސްޕީޑުގައި ކުރިއަށް ނުދިޔަ ކަމަށާއި އޭގެ ސަބަބަކީ މި ސަރުކާރަށް ވާރުތަވި އިގްތިސާދުގެ ތެރެއިން ހައްލުކުރަން ޖެހިފައި ހުރި ބައިވަރު ކަންކަމުގެ ތެރެއިން ކުރިމަތިވި ދަތިތަކުގެ ސަބަބުން ކަމަށެވެ. ނަމަވެސް އެ ކަންކަމުން ކުރިއަރައިގެން އައިސް މަސައްކަތްތައް ފެށިގެންދާ ހިސާބަށް އައިސްފައިވާ ކަމަށް ރައީސް ވިދާޅުވި އެވެ.
ރަސްމާލެ ހިއްކުމުގެ މަސައްކަތް 70 ހެކްޓަރުގެ ބިން ދިގު މުއްދަތަކަށް ދޭގޮތަށް ފުރަތަމަ ހަވާލުކުރީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާ އެވެ. އެ މަސައްކަތް 2023 ވަނަ އަހަރުގެ ޑިސެމްބަރު މަހުގެ 18 ވަނަ ދުވަހު ފެށީ އަށް މަސް ދުވަހުގެ ތެރޭގައި ނިންމާ ގޮތަށެވެ. ނަމަވެސް އެ ކުންފުންޏަށް ބިން ދޫކޮށްގެން މަޝްރޫއުގެ މަސައްކަތް ކުރިއަށް ގެންދިއުމަށް ބޭނުންނުވާތީ އެ އެއްބަސްވުން ސަރުކާރުން ވަނީ އުވާލާފަ އެވެ.
ރަސްމާލެ ހިއްކުމުގެ މަޝްރޫއު އަލުން ފެށިކަން އެޗްޑީސީން މިދިޔަ ނޮވެމްބަރުގައި އިއުލާންކުރި ނަމަވެސް، އެކަމާ ގުޅޭ އިތުރު ތަފްސީލެއް ހާމަކޮށްފައެއް ނުވެ އެވެ.
ރަސްމާކެ މަޝްރޫޢުގައި 1،153 ހެކްޓަރުގެ ބިން ހިއްކުމަށް ހަމަޖެހިފައިވެ އެވެ. އަދި އެތަނަކީ 65،000 މީހުންނަށް ބޯހިޔާވަހިކަން ފަހިކޮށް ދެވޭނެ ތަނަކަށް ވާނެ ކަމަށް ސަރުކާރުން ބުނެ އެވެ.