އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑާއި ލިވަޕޫލް ބައްދަލުކުރި މެޗު 2-2 އިން އެއްވަރުވެއްޖެ އެވެ.
މި ނަތީޖާއާއެކު ލިވަޕޫލް މި ވަގުތު ލީގުގެ އެއްވަނައިގައި އޮތީ 19 މެޗުން 46 ޕޮއިންޓް ހޯދައިގެންނެވެ. ދެ ވަނައިގައި އޮތް އާސެނަލަށް 20 މެޗުން ވަނީ 40 ޕޮއިންޓް ލިބިފަ އެވެ. ތިން ވަނައިގައި އޮތް ނޮޓިންހަމް ފޮރެސްޓަށް ވަނީ 19 މެޗުން 37 ޕޮއިންޓް ލިބިފަ އެވެ.
މި މެޗުން ލިބުނު ޕޮއިންޓާ އެކު، ޔުނައިޓެޑް އޮތީ 20 މެޗުން 23 ޕޮއިންޓާ އެކު ލީގުގެ 13 ވަނައިގަ އެވެ.
ލިވަޕޫލްގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، މެޗުގެ 52 ވަނަ މިނެޓްގައި ލިސަންޑްރޯ މާޓިނޭޒް ވަނީ ޔުނައިޓެޑަށް ލީޑު ނަގައިދީފަ އެވެ. ލިވަޕޫލުން މެޗުގެ 59 ވަނަ މިނެޓްގައި ނަތީޖާ އެއްވަރުކުރީ ކޯޑީ ގަކްޕޯ ޖެހި ގޯލުންނެވެ.
މެޗުގެ 70 ވަނަ މިނެޓްގައި ލިވަޕޫލުން ލީޑުނެގީ މުހައްމަދު ސަލާހު ކާމިޔާބުކުރި ޕެނަލްޓީންނެވެ. މިއީ، އޭރިއާތެރެއިން ޔުނައިޓެޑްގެ ޑިފެންޑަރު، މަތައިސް ޑި ލިޓް އަތުގައި ބޯޅަ ޖެހުމުން ލިބުނު ޕެނަލްޓީއެކެވެ.
ޔުނައިޓެޑަށް ނަތީޖާ އެއްވަރުކޮށްދިން ގޯލު މެޗުގެ 80 ވަނަ މިނެޓްގައި ކާމިޔާބުކޮށްދިނީ އަލެހަންދްރޯ ގަނާޗޯ ދިން ބޯޅައަކުން އަމަދު ޑިއާލޯ އެވެ. މެޗުން ޔުނައިޓެޑް މޮޅުވާން އިތުރު ވަގުތުގައި ހެރީ މެގުއާ އަށް ހުސް ފުރުސަތެއް ލިބުނު ނަމަވެސް އެ ބޯޅަ ދިޔައީ ހުރަސްދަނޑިމަތިން ބޭރަށެވެ.