ދައުލަތުން އުފުލާފައިވާ ޓެރަރިޒަމްގެ ދައުވާއާ ގުޅިގެން ޝަރީއަތް ނިމެންދެން ބަންދުގައި ބަހައްޓާފައި ހުންނެވި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲގެ ބަންދާއި މެދު އަލުން ގޮތެއް ނިންމުމަށް އޭނާ މިއަދު ކްރިމިނަލް ކޯޓަށް ހާޒިރުކުރަން ހަމަޖެހިފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
މައުލޫމާތު ލިބިފައިވާގޮތުގައި މިއަދު ހެނދުނު 10 ޖަހާއިރަށް އިމްރާން ކޯޓަށް ހާޒިރުކޮށްދިނުމަށް ފުލުހުންނަށް އިއްޔެ ޗިޓު ފޮނުވާފައިވާއިރު، އެ މައްސަލާގައި ޕްރޮސެކިއުޓާ ޖެނަރަލް އޮފީހުގެ ފަރާތުން ވަކީލުން ކޯޓަށް ހާޒިރު ވުމަށް ވެސް އިއްޔެ ވަނީ އަންގާފައެވެ.
އެންމެ ފުރަތަމަ ޝެއިޚް އިމްރާން ބަންދުކޮށްފައި ހުރީ ދޫނިދޫ ޑިޓެންޝަން ސެންޓަރުގައެވެ. ނަމަވެސް މިދިޔަ ޖުލައި މަހުގެ 23 ގައި ކުއްލިގޮތަކަށް އެމަނިކުފާނު ވަނީ މާފުށީ ޖަލަށް ބަދަލުކޮށްފަ އެވެ.
އާންމު ގޮތެއްގައި ހުކުމެއް އިއްވަންދެން، ތުހުމަތުކުރެވޭ މީހުން ބައިތިއްބަނީ ފުލުހުންގެ ބެލުމުގެ ދަށުގައެވެ. ކަރެކްޝަނަލް ސާވިސްގެ ބެލުމުގެ ދަށަށް ބަދަލުކުރަނީ ހުކުމެއް ކުރުމުންނެވެ. ޝެއިޚް އިމްރާން ކަރެކްޝަނަލް ސާރވިސްގެ ބެލުމުގެ ދަށުގައި ހުންނެވި އިރު އިމްރާނާ ދެކޮޅަށް އަދި އެއްވެސް ހުކުމެއް ކޮށްފައި ނުވާކަން ފާހަގަކޮށްލެ ވެއެވެ.