އައްްޑޫ ސިޓީ ހިތަދޫގައި ޑެންގީ ފެތުރެމުންދާ މިންވަރު އިތުރުވަމުން ދާތީ އެކަމަށް ހާއްސަ ސަމާލު ކަމެއް ދީ، އެ ބަލި އިތުރަށް ކޮންޓްރޯލް ކުރުމަށް އެންމެން ގުޅިގެން މަސައްކަތް ކުރަން ހިތަދޫ ރީޖަނަލް ހޮސްޕިޓަލުން އިލްތިމާސްކޮށްފި އެވެ.
ހޮސްޕިޓަލްގެ މެނޭޖަރު ހަދީޖާ ހަފުސާ މިއަދު ވިދާޅުވީ ހިތަދޫގައި މިދުވަސްކޮޅު ވަރަށް ހަލުއިކަމާ އެކު ޑެންގީ ފެތުރުމުންދާ ކަމަށެވެ. އެހެންވެ ރައްކާތެރި ކަމުގެ ފިޔަވަޅުތައް އަޅަމުން އަަންނަ ކަމަށް ވިދާޅުވި އެވެ.
ހޮސްޕިޓަލުން މައުލޫމާތު ދޭގޮތުގައި ހިތަދޫގައި ޑެންގީ ބޮޑަށް ފެތުރެމުން ދަނީ ކޮރަވަލާއި މޫލެކެޑެ ހިސާބުގައި ކަމަށެވެ. މިދިޔަ މަހުގެ 27 އިން މިއަދުގެ މިހާތަނަށް ހިތަދޫން ވަނީ ޑެންގީ 12 ކޭސް ފެނިފައި ވާއިރު އޭގެ ތެރެއިން 4 މީހަކަށް ހޮސްޕިޓަލުގައި އަންނަނީ ފަރުވާދެމުންނެވެ.
ހޮސްޕިޓަލުން ބުނީ މި ދޭތެރެއިން މުޅި ރާއްޖެ އަށް ޑެންގީ ފެތުރިގެން ދިޔައިރު، އައްޑޫގެ ހާލަތު ގޯސް ނުވެ އޮތީ ވާރޭ ނުވެހޭތީ ކަމަށާއި މި ދުވަސްކޮޅު ޑެންގޫގެ ކޭސްތައް ގިނަވެފައިވަނީ މިހާރު ދޭތެރެ ދޭތެރެއިން ވާރޭ ވެހޭތީ މަދިރި އާލާވާލެއް ގިނަ ވުމުގެ ސަބަބުން ކަމަށެވެ.
ހިތަދޫ ފިޔަވައި އައްޑޫގެ އެހެން ރަށަކުން ޑެންގީގެ ކޭސްތަކެއް މި ދުވަސްކޮޅު ރިޕޯޓް ކުރަމުން ނުދާކަމަށް ހޮސްޕިޓަލުން ވަނީ ހާމަކުރައްވާފައެވެ.