އައްޑޫ ސިޓީ ކައުންސިލް އިދާރާގެ ބައެއް ދޮރުތަކުގައި ފިންގަރ ޕްރިންޓް ޑޯ ލޮކް ތަކެއް ޤާއިމްކުރުމަށް ބޭނުންވެގެން އިއުލާން ކުރުމާއި ގުޅިގެން ގިނަ ބަޔަކު ކައުންސިލަށް ފާޑުކިޔަމުން އެބަގެންދެއެވެ.
ކައުންސިލް އިދާރާގެ ފަރާތުން މިމަހުގެ 2 ވަނަ ދުވަހު ކުރި އިއުލާންގައި ވަނީ 12 ފިންގާރ ޕްރިންޓް ޑޯ ލޮކް، ކައުންސިލް އިދާރާއަށް ވިއްކުމަށް ޝައުގުވެރިވާ ފަރާތްތަކުން އެކަމަށް އެދި ޕްރޮޕޯސަލް ހުށަހެޅުމުގެ ފުރުސަތު ހުޅުވާލާފައެވެ.
ނަން ހާމަނުކުރުމަށް ޝަރުތުކޮށް 'އައްޑޫލައިވް' އަށް މައުލޫމާތު ދިން ކައުންސިލް އިދާރާގެ މުވައްޒަފަކު ބުނި ގޮތުގައި، ބައެއް ދޮރުތަކުގައި ފިންގަރ ޕްރިންޓް ޑޯ ލޮކް ޤާއިމްކުރަން ނިންމާފައިވަނީ، ކައުންސިލަރުން ގެންގުޅޭ ބައެއް ލިޔެކިޔުންތައް "ރައްކާކުރުމަށް" ކަމަށް ބެލެވޭ ކަމަށެވެ.
މައުލޫމާތު ލިބިފައިވާ ގޮތުގައި ފިންގަރ ޕްރިންޓް ޑޯ ލޮކް ތަކެއް ހޯދަނީ ކައުންސިލް އިދާރާގެ 3 ވަނަ ފަންގިފިލާގެ ބައެއް ދޮރު ތަކުގައި ހަރުކުރުމަށެވެ. ކައުންސިލަރުންގެ ކޮޓަރިކޮޅު ތައް ވެސް ހުންނަނީ 3 ވަނަ ފަންގިފިލާގައެވެ. ބެލެވޭ ގޮތުގައި މި ފިންގަރ ޕްރިންޓް ޑޯ ލޮކް ހަރުކުރުމަށް ހަމަޖެހިފައިވަނީ 6 ކައުންސިލަރުންގެ އިތުރުން، ޑިޕާޓްމަންޓު ތަކުގެ އިސްބޭފުޅުންގެ ކޮޓަރިކޮޅު ތަކުގައެވެ.
ބައެއް ފަރާތްތަކުން ސޯޝަލް މީޑިޔާގައި ބުނެފައިވާ ގޮތުގައި ކައުންސިލް އިދާރާއަށް ޕްރިންޓް ޑޯ ލޮކް ތަކެއް ހޯދަނީ އެ އިދާރާގައި، ކައުންސިލަރުން ހިންގާ ކޮރަޕްޝަނުގެ އަމަލުތައް ބައެއް މުވައްޒަފުން ފަޅާއަރުވާލާނެތީ އެކަމާއި ބިރުން ކަމަށެވެ.
" މީގެ ކުރިން ކައުންސިލް އިދާރާތެރޭގައި ޖިންސީ ގޯނާކުރުމުގެ ޢަމަލްތައް ހިނގާފައިވާއިރު، ދޮރުގެ ތަޅު ވަރުގަދަ ކުރަނީ ކީއްކުރަންބާ ؟ "، ޓްވިޓާރގައި ޒުވާނަކު ލިޔެފައިވެއެވެ. މީގެ އިތުރުން އެހެން ޒުވާނަކު ލިޔެފައިވާ ގޮތުގައި ފިންގަރ ޕްރިންޓް ޑޯ ލޮކް ތަކެއް ހަރުކުރަނީ ކައުންސިލް އިދާރާގައި ވަގުން ގިނަވުމުގެ ސަބަބުން ކަމަށެވެ.