ފުވައްމުލަކުގައި މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް އުޅުނު ތުހުމަތުގައި ހައްޔަރުކުރި ދެ މީހުން ދޫކޮށްލަން ހައިކޯޓުން އަމުރުކޮށްފި އެވެ.
މި މައްސަލާގައި ހައްޔަރުކުރީ ފުވައްމުލައް، ދޫނޑިގަން، ކަރަންކާ ވިލާ، އަހްމަދު ނިއުޝާދު، 34 އާއި އެ އަވަށު، ޒަމާނީގެ، ހަސަން އާޒިމް، 29 އެވެ.
ފުވައްމުލަކު މެޖިސްޓްރޭޓުން ވަނީ އެ މީހުން ޝަރީއަތް ނިމެންދެން ބަންދުކުރަން މީގެކުރިން އަމުރުކޮށްފަ އެވެ. އެ އަމުރު މި ދެ މީހުން ވެސް ވަނީ ހައިކޯޓުގައި އިސްތިއުނާފްކޮށްފަ އެވެ.
މި މައްސައިގައި ހައިކޯޓުން ކުރި ހުކުމުގައި ބުނީ ޢާޒިމް ބަންދުކުރުމަށް ދަށުކޯޓުގެ ފަނޑިޔާރު ނެރެފައިވާ އަމުރުގައި ހެކީގެ މިންވަރު ބަޔާންކުރަމުން އެއް ނުކުތާގައި "އެކަށީގެންވާ ހެކި ހުރި" ކަމަށް ބަޔާންކުރުމަށްފަހ،ު އިތުރު ދެ ތަނެއްގައ،ި ތުހުމަތުކުރެވޭ "ކޮންމެވެސް މިންވަރެއްގެ" ހެކި ލިބިފައިވާ ކަމަށް ބަޔާންކޮށްފައިވާ ކަމަށާއި ޝަރީއަތް ނިމެންދެން އޭނާ ބަންދުކުރަން ނިންމި ނިންމުން ނިންމުމުގައި ފަނޑިޔާރު ރިޢާޔަތްކޮށްފައިވަނ،ީ ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާގެ (ށ) އަށް ކަމަށެވެ.
އަދި ނިއުޝާދު ބަންދުކުރުމަށް ދަށުކޯޓުގެ ފަނޑިޔާރު ނެރެފައިވާ އަމުރުގެ ތިން ތަނެއްގައ،ި ތުހުމަތުކުރެވޭ "ކޮންމެވެސް މިންވަރެއްގެ " ހެކި ލިބިފައިވާ ކަމަށް ބަޔާންކޮށްފައިވާކަން ފާހަގަކޮށް ހުކުމުގައި ވަނީ ތުހުމަތުކުރެވޭ ކޮންމެވެސް މިންވަރެއްގެ ހެކި ހުރިކަމަށް ބަޔާންކުރުމަށްފަހ،ު އިސްތިއުނާފުކުރާ ފަރާތްތައް ޝަރީޢަތް ނިމެންދެން ބަންދުކުރުމަށް ނިންމި ނިންމުމަކީ ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާއާ ޚިލާފު ކަމެއް ކަމަށް ބުނެފަ އެވެ.
ދަށުކޯޓުގެ ނިންމުމުގައި އޮތް ގޯހަކ،ީ އެކަމުގެ ސަބަބުން އެ އަމުރުގެ ޞައްޙަކަމަށް އަސަރުނުކުރާނެ އިޖުރާއީ އައިބެއްގެ ގޮތުގައި ދައުލަތުން ފާހަގަކޮށް، އެ އަމުރު ދަމަހައްޓައިދިނުމަށް އެދުނު ނަމަވެސް، ދަށު ކޯޓުން ނިންމާފައިވާ މި ނިންމުމަކ،ީ އެ އަމުރުގެ ޞައްޙަކަމަށް އަސަރުނުކުރާނެ އިޖުރާއީ އައިބެއްގެ ގޮތުގައި ބަލަންޖެހޭ ޤާނޫނީ އަސާސެއް ދައުލަތަށް ބުނެދެވިފައި ނުވާ ކަމަށްވެސް ހުކުމުގައިވެ އެވެ.
ހައިކޯޓުން ވަނީ މި ދެ މީހުން ބަންދުކުރަން ނެރެފައިވާ އަމުރުތަކަކީ ޞައްޙަ އަމުރުތަކެއް ބެލެވެން ނެތުމުން، އެ އަމުރު ބާތިލުކުރަން އަމުރުކޮށްފަ އެވެ.