އަމްރު އަލުން އެމްޑީޕީއާ ގުޅިއްޖެ

ދަ ޑިމޮކްރެޓްސް ދޫކޮށް، އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު، އަލުން އެމްޑީޕީއާ ގުޅިވަޑައިގެންފި އެވެ.

އަމްރު އަލުން އެމްޑީޕީއާ ގުޅިވަޑައިގެންނެވިކަން ހާމަކުރެއްވީ އެމްޑީޕީއަށް ނިސްބަތްވާ، ހުޅުމާލެ ދާއިރާގެ ކުރީގެ މެންބަރު އަލީ ނިޔާޒެވެ.

އެކްސްގައި ކުރެއްވި ޕޯސްޓެއްގައި ނިޔާޒު ވިދާޅުވީ ސިޔާސީ އިސްލާހީ މަސައްކަތުގައި އަބަދުވެސް އެންމެ މުހިއްމު މަސައްކަތެއް ކުރެވޭނެ ޖާގަ އޮންނާނީ އެމްޑީޕީގައި ކަމަށެވެ.

"އެ ފުރުސަތު ސިޔާސީ ކުރިމަގު ހޯދަން އެދޭ ކޮންމެ މީހަކަށް އެމްޑީޕީގައި ތަންމިނަށް ވަނީ ހުޅުވިފައި،" ނިޔާޒު ވިދާޅުވި އެވެ.

އެމްޑީޕީގައި ކުރިން ވަަރަށް އިސްކޮށް އުޅުއްވި އަމްރު އަކީ އެންމެފަހުން ބޭއްވި ރިޔާސީ އިންތިހާބުގައި ޑިމޮކްރެޓްސްގެ ރިޔާސީ ކެންޑިޑޭޓް އަދި ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބުގެ ރަނިންމޭޓެވެ.

އަމްރު ވަނީ އެންމެފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި މައްޗަންގޯޅި އުތުރު ދާއިރާއަށް ޑިމޮކްރެޓްސްގެ ޓިކެޓުގައި ވާދަކުރައްވާފަ އެވެ. މަޖިލިސް އިންތިހާބުގައި ޑިމޮކްރެޓްސް އަށް އެންމެ ގޮނޑިއެއް ވެސް ލިބިފައެއް ނުވެ އެވެ.