އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ އަނެއްކާވެސް ޖަލަށް ބަދަލުކޮށްފިއެވެ.
ޓެރަރިޒަމްގެ ތުހުމަތުކޮށްފައިވާ އިމްރާން އަނބުރާ ޖަލަށް ގެންދިޔައީ ކަރެކްޝަނަލް ސާވިސްގެ ބެލުމުގެ ދަށުން މިއަދު ކްރިމިނަލް ކޯޓަށް ހާޒިރުކުރުމަށް ފަހު ކަމަށެވެ.
އަދާލަތު ޕާޓީގެ އިސްބޭފުޅަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި ޝެއިޚް އިމްރާން އަނބުރާ ޖަލަށް ގެންދަން ނިންމީ ފުލުހުންގެ އިންޓެލިޖެންސް ރިޕޯޓެއްގެ މައްޗަށް ބިނާކޮށް ކަމަށް ކޯޓުން ބުނެފައިވާ ކަމަށެވެ.
އިމްރާންގެ މައްޗަށް ދައުލަތުން ކޮށްފައިވާ ޓެރަރިޒަމްގެ ދަޢުވާގެ ޝަރީއަތުގައި މިހާތަނަށް ބާއްވާފައި ވަނީ އެންމެ އަޑުއެހުމެކެވެ. އެ މައްސަލަ ކްރިމިނަލް ކޯޓުގައި ބަލަމުންދިޔަ ތިން ފަނޑިޔާރުންގެ ތެރެއިން ދެ ފަނޑިޔާރަކު މިހާރު ހައި ކޯޓަށް ވަނީ ބަދަލުކޮށްފަ އެވެ. އޭގެ ފަހުން މި މައްސަލަ ބަލަން އަލުން ބެންޗެއް އެކުލަވާލައިފައެއް ނުވެ އެވެ.