ގޯލްޑަން ފުޓްސަލް މުބާރާތުގައި ކުޅުނު ފުރަތަމަ މެޗުގައި ހިތަދޫ އިން މަރަދޫގެ މައްޗަށް 3-0 އިން ކުރި ހޯދައިފި އެވެ.
ހުޅުމާލޭ ރެހެންދި ފުޓްސަލް ދަނޑުގައި ކުޅުނު މި މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، މި މެޗުގައި ފެނިގެންދިޔަ ފުރަތަމަ ގޯލު ހިތަދޫ ޓީމަށް ކާމިޔާބުކޮށް ދިނީ އީމާން އެވެ. މިއީ ހަސަން ރާއިފް އަހުމަދު (ހަންނަ) ހުސްކޮށްލާފައި ދިން ޕާހަކުން އީމާން ކާމިޔާބު ކުރި ގޯލެކެވެ.
މި ގޯލަށް ފަހު ވެސް ހިތަދޫ ޓީމުން ދިޔައީ މަރަދޫގެ ގޯލަށް ނުރައްކާ ކުރަމުންނެވެ. އެގޮތުން މި ހާފުގައި ހިތަދޫ ޓީމުން އިތުރު ދެ ގޯލު ކާމިޔާބުކުރިއިރު، އެ ދެ ގޯލު ކާމިޔާބުކޮށް ދިނީ ހާޒިމް ފައުޒީ އާއި ދާނިޝް އެވެ.
މުބާރާތުގައި ހިތަދޫ ޓީމުން ކުޅޭ ދެވަނަ މެޗުގައި މި މަހުގެ 20 ވަނަ ދުވަހު ނިކުންނާނީ މީދުއާ ދެކޮޅަށެވެ.
ގޯލްޑަން ފުޓްސަލް ޗެލެންޖްގެ މިއަހަރުގެ މުބާރާތުގައި 129 ޓީމަކުން ވާދަކުރާ އިރު، 320 މެޗު ކުޅުމަށް ވަނީ ހަމަޖެހިފަ އެވެ. މިއީ ރާއްޖޭގެ ބާއްވާ އެންމެ ބޮޑު ފުޓްސަލް މުބާރާތެވެ.
ގޯލްޑަން ފުޓްސަލް އެސޯސިއޭޝަނުން އެންމެ ފުރަތަމަ މި މުބާރާތް ބޭއްވީ 2015 ވަނަ އަހަރު އެވެ.