މެންޗެސްޓާ ސިޓީގެ ފުލްބެކް ކައިލް ވޯކާ އެ ކްލަބް ދޫކޮށްލަން ބޭނުންވާކަން އަންގައިފި އެވެ.
އެފްއޭ ކަޕްގެ ތިންވަނަ ބުރުގައި ރޭ ސަލްފޯޑް ސިޓީގެ މައްޗަށް 8-0 އިން ސިޓީން ކުރި ހޯދި މެޗަށް ނެގި ސްކޮޑުގައި ވޯކާ ހިމަނާފައެއް ނުވެ އެވެ.
މި މެޗަށް ފަހު ނޫސްވެރިންނާ ވާހަކަދައްކަމުން ސިޓީގެ ކޯޗު ޕެޕް ގާޑިއޯލާ ބުނީ މިދިޔަ ބުރާސްފަތި ދުވަހު ވޯކާ ސިޓީގެ އިސްވެރިންނާ ބައްދަލުކޮށް، އެ ކްލަބު ދޫކޮށް، އެހެން ގައުމެއްގައި ކުޅެން ބޭނުންވާ ކަމަށް ބުނެފަައިވާ ކަމަށާއި ރޭގެ މެޗަށް ވޯކާ ނުނެގީ ވެސް އެ ސަބަބާއި ހުރެ ކަމަށެވެ.
ވޯކާ ސިޓީ ދޫކޮށްލަން ބޭނުންވާ ސީދާ ސަބަބެއް ހާމަނުކޮށް ގާޑިޔޯލާ ވަނީ ވޯކާ އަށް ވަރަށް އިހުތިރާމް ކުރާ ކަމަށާއި، ވޯކާގެ ނިންމުމަށް ހުރަހަކަށް ވާން ބޭނުން ނުވާ ކަމަށް ބުނެފަ އެވެ. ނަމަވެސް ވޯކާ ބޭނުންވާ ގޮތަށް އެކަން ސީދާ ވާނެ ކަމަށް ބުނަން ނޭނގޭ ކަމަށްވެސް ގާޑިޔޯލާ ބުންޏެވެ.
ވޯކާ ،34، ސިޓީއާއެކު ހަދާފައިވާ ކޮންޓްރެކްޓުގައި ބާކީ އަދި 18 މަސް ދުވަސް އެބައޮތެވެ.
ޓޮޓެންހަމް ދޫކޮށް 2017 ގައި ސިޓީއާ ގުޅުނު ވޯކާ ވަނީ އެ ކްލަބާއެކު ހަ ޕްރިމިއާ ލީގާއި، ދެ އެފްއޭ ކަޕްގެ އިތުރުން ޗެމްޕިއަންސް ލީގެއް ކާމިޔާބުކޮށްފަ އެވެ.