ދިވެހިރާއްޖޭގެ ޖުމްހޫރިއްޔާގެ ފަޚުރެއް ކަމުގައި ބެލެވިފައިވާ، ޖުމްހޫރީ މައިދާނުގައި ހުރި ދިދަ ވެސް އެތަނުން ނެގުމަށް ހަމަޖެހިފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
ހައުސިން މިނިސްޓްރީގެ އިސް އޮފިޝަލަކު 'އައްޑޫލައިވް' އަށް މައުލޫމާތު ދެމުން ބުނިގޮތުގައި، ޖުމްހޫރީ މައިދާނުގައި ހުރި ބޮޑު ދިދަ އެތަނުން ނަގަނީ ކީއްވެގެން ކަން އެނގިވަޑައިނުގަންނަވާ ކަމަށާއި ނަމވެސް އެއީ ސީދާ ރައީސް އޮފީހުން އަންގައިގެން ކުރާކަމެއް ކަމަށެވެ.
" ޖުމްހޫރީ މައިދާނުގައި ހުރި ކޯއްޓޭ އެއްކޮށް ތަޅާލުމަށްފަހު އަލުން ބިނާކުރުމަށް ނިންމާފައިވަނީ، ވަރަށް އަވަހަށް އެ މަސައްކަތް ފެށިގެންދާނެ. " އޭނާ ވިދާޅުވިއެވެ.
ޖުމްހޫރީ މައިދާނުގައި ހުންނަ ބޮޑު ދިދަ ހަރުކޮށްފައި ހުރި ބިނާ އެއްކޮށް ތަޅާލުމަށްފަހު އަލުން ބިނާކުރުމަށް ނިންމާފައިވާއިރު، ޖުމްހޫރީ މައިދާނުގައި ހުރި ބައެއް ގަސްތައް ވެސް "ޑެމޭޖް" ވެފައި ހުރި ކަމަށް ބުނެ ކަނޑަމުން ގެންދާކަން ފާހަގަކޮށްލެވެއެވެ. ޖުމްހޫރީ މައިދާން ސަރަހައްދުގައި ހުރި ގަސްތައް ހައުސިން މިނިސްޓްރީން ނަގަމުންދާ ސަބަބާ ބެހޭ ގޮތުން މިނިސްޓަރު ޑރ. މުހައްމަދު މުއީއްޒު ކުރެއްވި ޓްވީޓެއްގައި ވިދާޅުވެފައިވަނީ އެ ގަސްތައް ނަގަނީ އެއީ ހަލާކުވެފައިވާ ގަސްތަކެއް ކަމަށް ވާތީ އެވެ.
މީގެ އިތުރުން ސަލްޓަން ޕާކް ކުރިމަތީގައި ހުންނަ ބިނާ ވެސް ހައުސިން މިނިސްޓްރީގެ ފަރާތުން ނަގާފައިވާއިރު، އެ ބިނާ ނަގާފައި ވަނީ ވެސް ރައީސް އޮފީހުން ހައުސިން މިނިސްޓްރީ އަށް އަންގައިގެން ކަމަށް 'އައްޑޫލައިވް' އަށް މައުލޫމާތު ދިން ހައުސިން މިނިސްޓްރީގެ އޮފިޝަލް ވަނީ ވިދާޅުވެފައެވެ.