އައްޑޫ ރައްޔިތުންނަށް ކަރަންޓާ ހެދި އުފުލަން ޖެހިފައި މިއޮތީ ނިމުމެއް ބޮޑު ތަކުލީފެކެކެވެ. ހާއްސަކޮށް އައްޑޫގެ ގުޅައިވާ ރަށްތަކުން ކެނޑޭ މައްސަލަ އަކީ ވަރަށް ޒަމާންވީ މައްސަލައެކެވެ. އެތައް ސަރުކާރެއް އައިސް ގޮސްފައިވާ އިރު، ރައްޔިތުންގެ ބޮޑު ތަކުލީފަށް އެއްވެސް ސަރުކާރަކަށް ހައްލުކޮށް ދެއްވިފައެއް ނެތެވެ.
ކޮންމެ ސަރުކާރަކުން ވެސް މިކަމުގެ ޒިންމާ އަޅުވަނީ ކުރީގެ ސަރުކާރުތަކުގެ ބޮލުގަ އެވެ. ފެނަކަ އިން އައްޑޫގެ ގުޅިފައިވާ އަވަށްތަކަށް ކަރަންޓް ދޭ މަރުކަޒީ އިންޖީނު ގޭގެ އިންޖީނުތައް މަރާމާތުކޮށް ނުބެލެހެއްޓޭ ވާހަކަ އެވެ. ކަންކަން ރަނގަޅު ކުރަން މަސައްކަތްކޮށްފައި ނެތް ވާހަކަ އެވެ. އެތައް އިހުމާލެއްގެ ވާހަކަ އެވެ.
އަނެއްކޮޅުން އައްޑޫގައި ކަރަންޓް ބޭނުން ކުރާ މިންވަރު އެއް ދުވަހުން އަނެއް ދުވަހަށް އިތުރު ވަނީ އެވެ. އެކަމަކު ކަރަންޓް ބޭނުން ކުރާ މިންވަރު އިތުރުވަމުންދާ އިރު، ކެޕޭސިޓީ އިތުރެއް ނުކުރެވެ އެވެ. މީގެ ސަބަބުން އިންޖީނުތަކަށް އޮބިނޯވެގެން އިންޖީނުތަކަށްވަމުންދާ ޓެކްނިކަލް ގިނަ މައްސަލަތަކާ ހެދި އަބަދު ވެސް އައްޑޫގެ ގުޅިފައިވާ އަވަށްތަކުގެ ރައްޔިތުން ކުރަން ކަރަންޓް ކެނޑޭކަމުގެ ޝަކުވާ އެވެ.
އެ ޝަކުވާތައް މި ހަފުތާއާ އެކު މި ވަނީ އިތުރުވެފަ އެވެ. މިހާރު ކޮންމެ ދުވަހަކު އެތައް ފަހަރު ކަރަންޓް އެބަ ކަނޑަ އެވެ. އެހެންވެ މިހާރު ކަރަންޓް އޮތް ނަމަ ދެން ކުރިއަށް އޮތް ގަޑިއެއްހާ އިރު ފަހުން ކަރަންޓް އޮންނާނެކަމުގެ އެއްވެސް އުންމީދެއް ނެތެވެ.
މި ޝަކުވާ އާއި ކަންބޮޑުވުންތައް އެތައް ބަޔަކު މިހާރު އަންނަނީ ސޯޝަލް މީޑިއާގައި ވެސް ހިއްސާކުރަމުންނެވެ.
އެހެންވެ އައްޑޫ ރައްޔިތުން އެދެނީ ރައީސް ޑރ. މުހައްމަދު މުއިއްޒު ފަރާތުން މިކަމަށެވެ. ރައީސް ބޭބެ އެވެ. ކަރަންޓް މައްސަލަ ހައްލުކޮށް ދެއްވާށެވެ. ކަރަންޓާ ނުލައި މިހާރު އެއްވެސް ކަމެއް ކުރެވޭކަށް ނެތެވެ. ކަރަންޓާ ނުލައި މިހާރު ސިކުންތާހެއްހާ ވަގުތުކޮޅެއް ވެސް ހޭދަކުރަން ޖެހުމަކީ ވަރަށް ބޮޑު ތަކުލީފެކެވެ. ވޭނެކެވެ.
މި ވޭނާއި ކެކުޅުން އައްޑޫ ރައްޔިތުން އުފުލަންވީ ކިހާ ދުވަހެއް ވަންދެން ކަމެއް ނޭނގެ އެވެ. އެކަމަކު މި ސަރުކާރު ގެނައީ ކަންކަން ރަނގަޅު ކުރަން ކަމަށްވާތީ ރައީސް ބޭބެ ގާތު ބުނެލަން އޮތީ މިހެންނެވެ؛ ހެޔޮނުވާނެ އެވެ. އައްޑޫގެ ކަރަންޓް މައްސަލަ އަށް އަވަސް ދާއިމީ ގެނެސްދެއްވާށެވެ.
ކުރިއަށް މިއޮތީ ރޯދަ މަހެވެ. ރޯދަ މަހު ކަރަންޓާ ނުލައި އުޅެންވެއްޖެ ރައްޔިތުން އުޅެން ޖެހޭނެ ރައީސް ބޭބެ ވެސް ވަޒަންކޮށްލައްވާށެވެ.
ހުރި މައްސަލަތައް ރަނގަޅަށް ދެނަގެނެ، އެކަންކަން ރަނގަޅުކޮށް ދިނުން ރައްޔިތުން އުފާނެ އެވެ. ތިއީ އަބަދު ވެސް ރައްޔިތުން އުފާކޮށް ދޭން މަސައްކަތް ކުރައްވާ ރައީސް ބޭބެެއެއް ނޫން ހެއްޔެވެ؟ އެހެންވީމާ އައްޑޫގެ މި އަޑު އައްސަވައި، ކަރަންޓަށް ޖެހިފައި މިއޮތް އޮތުން ނިމުމަކަށް ގެނެސްދޭށެވެ.
އޭރު ރައްޔިތުން އަަބަދު ވެސް ތިބޭނީ ރައީސް މުއިއްޒު ބޭބެއާ އެކީ ނޫން ހެއްޔެވެ؟