އަފްގާނިސްތާންގެ ތާލިބާނުންނާ ދެކޮޅަށް އިސްލާމީ ގައުމުތަކުގެ ލީޑަރުން ނުކުންނަން ޖެހޭ ކަމަށް ބުނެ ތާލިބާނުންނަށް ޕާކިސްތާންގެ މަލާލާ ޔޫސަފްޒާއީ ވަރަށް ބޮޑަށް ފާޑު ކިޔައިފި އެވެ.
މަލާލާ އަކީ އަންހެން ކުދިންގެ ތައުލީމަށް ވަކާލާތު ކުރަމުން ދިއުމުގެ ސަބަބުން 2012 ގައި އުމުރުން 15 އަހަރުގައި ތާލިބާނުންގެ ހަމަލާއެއްގައި ކިރިޔާ މަރުން ސަލާމަތްވި މީހެކެވެ. އެ ހަމަލާއާ ގުޅިގެން އޭނަ އިނގިރޭސިވިލާތަށް ފަރުވާ އަށް ގެންދިޔަ ފަހުން ދިރިއުޅެމުން އަންނަނީ އެ ގައުމުގަ އެވެ.
ޕާކިސްތާންގައި އަންހެން ކުދިންގެ ތައުލީމަށް ހާއްސަކޮށްގެން މި ހަފުތާގައި ދެ ދުވަހުގެ މުއްދަތަށް ބޭއްވި އިންޓަނޭޝަނަލް ސަމިޓްގައި ބައިވެރިވެ އިއްޔެ އިސްލާމްއާބާދުގައި ދެއްކި ވާހަކައިގައި މަލާލާ ބުނީ "ތާލިބާނުންގެ ސިޔާސަތުތަކަކީ އިސްލާމީ އުސޫލުތައް ނޫން" ކަމަށެވެ.
"އެ މީހުން ނުދެކޭ އަންހެނުންނަކީ އިންސާނުން ކަމަކަށް ވެސް." އަންހެން ކުދިންގެ ތައުލީމަށް ވަކާލާތުކޮށް، ނޯބެލް ސުލްހައިގެ އިނާމު ވެސް ލިބުފައިވާ މަލާލާ، 27، ބުންޏެވެ
އޭނަ ބުނީ އަންހެން ކުދިންނާއި އަންހެން ކުދިން ތައުލީމުން މަހުރޫމްކޮށް، އަންހެނުންނަށް ވަޒީފާ އަދާކުރުމުުގެ ހައްގު ވެސް ތާލިބާނުން ނިގުޅައިގެންފައިވާ އިރު، އެ މީހުން އަފްގާނިސްތާންގައި ތަންފީޒު ކުރަނީ އިސްލާމީ އުސޫލުތަކެއް ނޫން ކަމަށެވެ. އަދި އެ މީހުންގެ އުސޫލުތަކާ ދެކޮޅަށް ކެރިގެން ހިތްވަރާ އެކީ ނުކުންނަ އަންހެނުން ބޮޑެތި އަދަދުތައް ދެމުން އަންނަ ކަމަށް ވެސް މަލާލާ ބުންޏެވެ.
"އެ މީހުންގެ އެންމެ ބޮޑު ސިޔާސަތަކީ ދެ ޖިންސްގެ ހަމަހަމަކަން އެއްކޮށް ނައްތާލައި، އަންހެނުން މުޅި ނިޒާމުން އެކަހެރިކޮށްފައި ބޭތިއްބުން،" އޭނަ ބުންޏެވެ. "އެހެންވެ އިސްލާމީ ލީޑަރުން އެބަޖެހޭ ތާލިބާނުންނާ ދެކޮޅަށް ނުކުންނަން."