ރާއްޖޭގެ މަަޝްހޫރު ޑައިރެކްޓަރު ފާތުމަތު ނަހުލާގެ އާ ފިލްމު "ސޮރީ" ގެ ކާސްޓާ ބަތަލާ ޝީލާ ނަޖީބާއި ކުރީގެ އެކްޓަރު ހުސައިން ސޮބާ ވެސް ގުޅިއްޖެ އެވެ.
މި ފިލްމުގެ ޝޫޓިން މިހާރު ބާރަށް ކުރިއަށްދާ އިރު، ފިލްމުގެ ސެޓުން ނަގާފައިވާ ވީޑިއޯކޮޅަކާ އެކު ޝީލާ ޓިކްޓޮކް ޕޯސްޓެއްގައި ބުނީ ސޮބާއާ އެކީ މަސައްކަތް ކުރަން ލިބުމުން ވަރަށް އުފާވެފައިވާ ކަމަށެވެ. އަދި މިއީ ހުވަފެނެއް ހަގީގަތަކަށް ވެސް ވުން ކަމަށް ބުންޏެވެ.
ސޮބާ ވެސް ބުނީ އޭނަގެ ކެރިއަރުގައި މިހާތަނަށް ޝީލާއާ އެކީ ފިލްމީ އެއްވެސް މަސައްކަތެއް ކުރިން ކޮށްފައި ނުވާ ކަމަށާއި އެ އުންމީދު މިހާރު "ސޮރީ" އިން ހާސިލުވެއްޖެ ކަމަށެވެ.
@shielanajeeb Right before action #sorrythemovie @Fathimath Nahula
ލޯބީގެ އަސަރު ގަދަ ވާހަކައަކަށް ހަދާ "ސޮރީ" ގެ ލީޑް ކާސްޓުންނަކީ ޔޫސުފް ޝަފީއު (ޔޫއްޕެ) އާއި މަރިޔަމް އައްޒަ އެވެ. އަދި މި ފިލްމުގެ ވަރަށް މުހިއްމު ރޯލުތަކަކުން ކުޑަ ދެ އަންހެން ކުދިން ވެސް ފެންނާނެ އެވެ.
"ސޮރީ" ގެ ކާސްޓާ ސޮބާ ގުޅުނު އިރު، ފާހަގަކޮށްލެވޭ ކަމަކީ އޭނަ އަކީ ނަހުލާގެ ފުރަތަމަ ފީޗާ ފިލްމު 1998 ގެ "ފަހުނޭވާ" ގެ ބަތަލުކަމެކެވެ. ސޮބާ އެންމެ ފަހުން ކުޅުނު ފިލްމަކީ ކުރީގެ ޑައިރެކްޓަރު އަބްދުލް ފައްތާހްގެ 2014 ގެ "އާދޭސް" އެވެ. ސޮބާ އަކީ 90 ގެ ތެރޭގައި ރާއްޖޭގައި އެންމެ މަޝްހޫރު އެއް އެކްޓަރެވެ.
ލަވަކިޔުންތެރިއެއްގެ ގޮތުގައި ވެސް ފާހަގަކޮށްލެވުނު ސޮބާގެ މަގުބޫލު ފިލްމުތަކުގެ ތެރޭގައި "ފުންއަސަރު"، "ލޯބީގެ އަނިޔާ"، "އެ ތޫފާނީ ރޭ" އަދި "އުމުރަށް" ހިމެނެ އެވެ.
ނަހުލާގެ "ސޮރީ" އިން ސޮބާ އާއި ޝީލާ ވެސް ފެނިގެންދާ އިރު، ޝީލާ އަކީ ފިލްމީ ދާއިރާ އަށް ނުކުތް ފަހުން މެދުކެނޑުމެއް ނެތި ދާއިރާގައި ހިފަހައްޓަމުން އަންނަ ބަތަލާއެކެވެ. އޭނަގެ އެންމެ ފަހުގެ ފިލްމަކީ މިދިޔަ އަހަރުގެ "ބިބީ" އެވެ. ޝީލާ އަންނަނީ ޑާކް ރެއިން އެންޓަޓައިންމަންޓުން މި އަހަރު ގެނެސްދޭން ހަމަޖެހިފައިވާ ފުރަތަމަ ފިލްމު "ޕްރޮޖެކްޓް 37" ގެ މަސައްކަތް ވެސް ކުރަމުންނެވެ.
އެކްޓަރު މުހައްމަދު މަނިކުގެ އަންހެނުން ޝީލާ ކުރިން މަސައްކަތްކުރި ނަހުލާގެ ޕްރޮޖެކްޓްތަކުގެ ތެރޭގައި "ޒުލޭހާ" އާއި "ހެޔޮނުވާނެ" އަދި "4426" ހިމެނެ އެވެ.