ރާއްޖޭގެ މަޝްހޫރު ޑައިރެކްޓަރު ފާތުމަތު ނަހުލާގެ އާ ފިލްމު "ސޮރީ" ގެ ލަވައަކަށް ނަށާނެ އަންހެން ކުދިންތަކެއް ބޭނުންވެގެން އެކަމުގެ އެހީއަކަށް އެދިއްޖެ އެވެ.
ފޭސްބުކް ޕޯސްޓެއްގައި އޭނަ ވަނީ ބ. ކަމަދޫ ނޫނީ ރީތިކޮށް ނަށާނެ އަންހެން ކުދިންކޮޅެއް ތިބި ރަށެއް ނެތްތޯ ސުވާލު ވެސްކޮށްފަ އެވެ. އަދި އެނގޭ ނަމަ އެކަން ހިއްސާކޮށް ދޭން އެދިފައިވެ އެވެ.
ނަހުލާގެ ޕޯސްޓްގައި ކަމަދޫގެ ވާހަކަ ގެނެސްފައި އޮތީ މިދިޔަ އަހަރުގެ ބޮޑު އީދުގައި އެ ރަށުގައި ބޭއްވި އީދު ހަރަކާތްތަކުގެ ތެރެއިން ރަށުގެ އަންހެން ކުދިންތަކެއްގެ ފަރި ނެށުންތަކެއްގެ ވާހަކަ މުޅި ރާއްޖެ އަށް ފެތުރި، އެ ކުދިންގެ ރީތިކަމުގެ ވާހަކަ ވެސް ވަރަށް ބޮޑަށް ދެކެވިފައި އޮތުމުން ކަމަށް ބެލެވެ އެވެ.
ނަހުލާގެ "ސޮރީ" އަކީ އޭނަގެ ވާހަކައަކަށް ޑައިރެކްޓްކުރާ އަސަރު ގަދަ ލޯބީގެ ފިލްމެވެ. މީގެ ކާސްޓްގައި ޔޫސުފް ޝަފީއު (ޔޫއްޕެ) އާއި މަރިޔަމް އައްޒަ އާއި ޝީލާ ނަޖީބާއި ކުރީގެ އެކްޓަރު ހުސައިން ސޮބާގެ އިތުރުން ނަހުލާގެ އާއިލާގެ އަންހެން ދެ ކުޑަ ކުއްޖަކު ވެސް ހިމެނެ އެވެ.
"ކަލާޔާނުލާ" އާއި "ނާއުންމީދު" އާއި "ޒުހޭލާ" ގެ އިތުރުން "ޔޫސުފް" ފަދަ މަގުބޫލު ފިލްމުތައް ގެނެސްދިން ނަހުލާގެ އެންމެ ފަހުގެ ޑައިރެކްޝަނަކީ 2016 ގެ ބިރުވެރި ފިލްމު "4426" އެވެ.