އައްޑޫ ސިޓީގެ ހުރިހާ ރައްޔިތުންނަށް ވެސް މިހާރު ކުރިމަތިވެފައިވާ އެންމެ ބޮޑު އެއް މައްސަލައަކީ އެކަށީގެންވާ ސިއްޙީ ޙިދުމަތްތަކެއް ރަށުގައި ތިބެގެން ލިބެން ނެތުމެވެ. ކޮންމެ ފަހަރަކު ޑޮކްޓަރަށް ދައްކަން މާލެ އަށް ދާން ނުޖެހި އަމިއްލަ ރަށުގައި ތިބެގެން ފެންވަރު ރަނގަޅު ސިއްޙީ ޚިދުމަތްތަކެއް ލިބިގެން ދިޔުމަކީ އައްޑޫގެ ކޮންމެ ރައްޔިތެއްގެ ވެސް އުއްމީދެކެވެ.
މިހާރު އައްޑޫ ސިޓީގެ ހުރިހާ ރައްޔިތުން ވެސް ބަރޯސާ ވާން ޖެހިފައިވަނީ ހިތަދޫގައި ހުންނަ ރީޖަނަލް ހޮސްޕިޓަލުން ލިބޭ ޚިދުމަތްތަކަށެވެ. ހިތަދޫ ރީޖަނަލް ހޮސްޕިޓަލުން އެކަށީގެންވާ ޙިދުމަތްތަކެއް ފޯރުކޮށްދިނުމަށް ތަނުގެ ވެރިން ކިތަންމެ މަސައްކަތްތަކެއް ކުރައްވަމުން ގެންދެވި ނަމަވެސް، އެ ހޮސްޕިޓަލުގެ އިންފްރާސްޓަރަކްޗަރ ހުރި ގޮތުން އެކަށީގެންވާ ޙިދުމަތްތަކެއް ފޯރުކޮށްދެވެން ނެތްކަމަށް ތަނުގެ ވެރިން ވެސް އެއްބަސްވެއެވެ.
އެންމެ ފުރަތަމަ އައްޑޫގައި 100 އެނދުގެ ހޮސްޕިޓަލެއް އަޅަން ނިންމިކަން ސަރުކާރުން ހާމަކުރީ ކުރީގެ ރައީސް މައުމޫނުގެ ވެރިކަމުގެ ފަހުކޮޅު، 2007 ވަނަ އަހަރުއެވެ. އޭރުގެ ހެލްތް މިނިސްޓަރ، އިލްޔާސް އިބްރާހިމް ހިތަދޫ ރީޖަނަލް ހޮސްޕިޓަލަށް ވަޑައިގަތުމަށް ފަހު އެތަނުގެ ޚިދުމަތްތައް ދިނުމަށް ދަތިތައް ހުރި ކަމަށާއި އެހެންވެ 100 އެނދުގެ ހޮސްޕިޓަލެއް ބިނާކުރުމުގެ މަސައްކަތް ވަރަށް އަވަހަށް ފެށިގެންދާނެ ކަމަށް ވިދާޅުވިއެވެ.
އެދުވަހު އައްޑޫގެ ރައްޔިތުން އެވާހަކަތައް އަޑުއެހީ ނުހަނު އުފަލުން ތިބެއެވެ. ނަމަވެސް އެ ހޮސްޕިޓަލް އަޅަން ސަރުކާރުން ކަނޑައެޅި ބިން މިހާތަނަށް ދެތިން ފަހަރަށް ވުރެ ގިނައިން އައްޑޫގެ ރައްޔިތުން ސާފުކޮށްފައިވާއިރު އަދިވެސް ހޮސްޕިޓަލް އެޅުމުގެ މަސައްކަތް ފެށިފައެއް ނުވެއެވެ. އިލްޔާސް އިބްރާހިމް އެހެން ވިދާޅުވި ފަހުން، މައުމޫނުގެ ވެރިކަން ނިމި، ރައީސް ނަޝީދަށް ފަހު ރައީސް ޑރ. ވަޙީދުގެ ވެރިކަމުގައި ވެސް އައްޑޫގެ ރައްޔިތުން ދެކެމުން އައި 100 އެނދުގެ ހޮސްޕިޓަލުގެ ހުވަފެން ހަަޤީޤަތަކަށް ވެފައެވެ ނުވެއެވެ.
ރައީސް ނަޝީދުގެ ވެރިކަމުގައި ވެސް ހޮސްޕިޓަލް އެޅިގެން ދާނެ ކަމަށް އައްޑޫގެ ރައްޔިތުން ތިބީ އުއްމީދުކޮށްގެންނެވެ. ނަމަވެސް އެކަން ނުވެ އެމަނިކުފާނުގެ ވެރިކަން ނިމި ދެން އައި ޑރ. ވަޙީދުގެ ސަރުކާރުން ވަނީ 2012 ވަނަ އަހަރު 100 އެނދުގެ ހޮސްޕިޓަލް އެޅުމަށް ބޭނުންވާ ފައިސާގެ ކަންކަން ހަމަޖެހިފައިވާ ކަމަށް ބުނެފައެވެ. އެއީ ވެސް ކުރިއެރުމެއް ކަމަށް އައްޑޫ ރައްޔިތުންގެ ތެރެއިން މަދު ބަޔަކު ނަމަވެސް ތިބީ ޤަބޫލުކޮށްގެންނެވެ.
ހޮސްޕިޓަލުގެ މަސައްކަތް ނުފެށި ލަސްވުމުގައި އައްޑޫ ސިޓީ ކައުންސިލްގެ ދައުރެއް އޮތް ކަމަށް ވެސް ބައެއް މީހުން ތުހުމަތު ކުރެއެވެ. އެގޮތުން ހޮސްޕިޓަލް އަޅަން ކުރިން ބިމެއް ކަނޑައަޅާފައި ވަނިކޮށް ހޮސްޕިޓަލް އަޅަން ޖެހޭނީ ހިތަދޫ ޕޮލިސް ޓްރޭނިން ސްކޫލް ހުރި ބިމުގައި ކަމަށް ކައުންސިލުން ހާމަކުރިއެވެ. އެކަމާއި ގުޅިގެން ކައުންސިލާއި ސަރުކާރާއި ދެމެދު ހިޔާލު ތަފާތުވުންތަކެއް ވެސް އުފެދިގެން ގޮސްފައިވެއެވެ.
ކޮންމެ އަކަސް ޑރ.ވަޙީދުގެ ވެރިކަން ނިމިގެން ދިޔައިރުވެސް ހޮސްޕިޓަލުގެ ޢަމަލީ މަސައްކަތެއް ފަށައެއް ނުގަނެވުނެވެ. ދެން ވެރިކަމަށް އައީ މިހާރުގެ ރައީސް އަބްދުﷲ ޔާމީންއެވެ. އެބޭފުޅާގެ ވެރިކަމުގައި އައްޑޫގެ ރައްޔިތުންނަށް ހޮސްޕިޓަލުގެ ކުރެހުން ދައްކާލެވުން ފިޔަވައި އާ ހޮސްޕިޓަލާއި ގުޅޭ ގޮތުން މާ ބޮޑު މަސައްކަތްތަކެއް ކުރެވެމުން ނުދާކަން ފާހަގަކޮށްލެވެއެވެ.
ހެލްތް މިނިސްޓަރ ކަމުގައި ހުންނެވި ބޭފުޅަކު ހިތަދޫ ރީޖަނަލް ހޮސްޕިޓަލަށް ވަޑައިގެން އެތަނުގެ މުވައްޒަފުންނާއި ދެއްކި ވާހަކަތަކުގައި، އާ ހޮސްޕިޓަލަކަށް ވުރެ މިހާރުގެ ހޮސްޕިޓަލް ތަރައްޤީކުރުން މުހިއްމުކަން ދޭހަވާގޮތަށް ވާހަކަ ދެއްކުމުން ގޯސްވީ އެވާހަކަ ގެނެސް ދިން ނޫސްވެރިންނެވެ.
ރައްޔިތުންގެ މަޖިލީހުގެ ކޮމިޓީއަކަށް އެމައްސަލަ ހުށަހެޅުމުން، މަޖިލީހުގެ ކޮމިޓީގައި ވެރިކަން ކުރާ ޕީޕީއެމް އަށް ނިސްބަތްވާ މެންބަރުން ދެއްކި ވާހަކަތަކުން ހީވެގެން ދިޔައީ، 100 އެނދުގެ ހޮސްޕިޓަލްގެ މަސައްކަތް ޖެހިގެން އައި ދުވަހު ފެށިގެންދާނެ ހެންނެވެ.
މަޖިލީހުގެ ކޮމިޓީގައި ވާހަކަ ދައްކަމުން ހުޅުދޫ ދާއިރާގެ މަޖިލިސް މެންބަރ، މުހައްމަދު ޝާހިދު ވިދާޅުވި ގޮތުގައި 2017 ވަނަ އަހަރު ނިމުމުގެ ކުރިން އައްޑޫ ސިޓީގައި 100 އެނދުގެ ހޮސްޕިޓަލް ހުޅުވިގެންދާނެ ކަމަށެވެ.
"" ﷲ އިރާދަކުރެއްވިއްޔާ 2017 ވަނަ އަހަރު ނިމުމުގެ ކުރިން ރާއްޖޭގެ އިއްޒަތްތެރި ރައީސުލްޖުމްހޫރިއްޔާ އަލްފާޟިލް އަބްދުﷲ ޔާމީން އެ ހޮސްޕިޓަލް ހުޅުއްވާ ދެއްވާނެ. އެހާ ވެސް އިސްޕީޑުގައި މި މަސައްކަތް މިދަނީ "، މަޖިލީހުގެ ކޮމިޓީ ބައްދަލުވުމެއްގައި ވާހަކަ ދައްކަވަމުން ޝާހިދު ވިދާޅުވެފައިވެއެވެ.
އައްޑޫގައި 100 އެނދުގެ ހޮސްޕިޓަލް އަޅަން ސަރުކާރުން މަސައްކަތް ނުކުރާ ކަމަށް ބުނެފި ނަމަ، ގޯސްވާނީ އެވާހަކަ ދެއްކި ބަޔެކެވެ. އެއީ ފިތުނަ އުފެއްދުމެއް ކަމަށް ވެދާނެއެވެ. އެހެން ކަމުން އައްޑޫގެ ހޮސްޕިޓަލް އެޅުމަށް ސަރުކާރުން ބޭނުންވާކަން ނުވަތަ ނުވާކަން ނިންމާނީ ވެސް ހަމަ ކިޔުންތެރިންނެވެ. ނަމަވެސް އޭގެ ކުރިން ތިރީގައި ފާހަގަކޮށްފައި މިވާ ނުކުތާތަަކަށް ބައްލަވާ ލައްވާށެވެ.
– އައްޑޫގައި 100 އެނދުގެ ހޮސްޕިޓަލް އަޅަން ސަރުކާރުން ނިންމީ 2007 ވަނަ އަހަރު.
– 2012 ވަނަ އަހަރުގެ ތެރޭގައި ހޮސްޕިޓަލް އެޅުމަށް ބޭނުންވާ ފަންޑު ހަމަޖެހިފައިވާކަން ސަރުކާރުން ހާމަކުރި.
– 2014 ވަނަ އަހަރު ހޮސްޕިޓަލުގެ ކުރެހުން ނިމުނުކަން އިއުލާންކުރި.
– 2017 އަށް ހޮސްޕިޓަލް ހުޅުވާނެ ކަމަށް ބުނެފައިވާއިރު އަދި އަމަލީ އެއްވެސް މަސައްކަތެއް ފަށާފައެއް ނުވޭ.
– ހުޅުމާލޭގައި ޓާޝިއަރީ ހޮސްޕިޓަލް އެޅުމަށް ނިންމީ 2014 ވަނަ އަހަރު، މި އަހަރުގެ އޯގަސްޓް 6 ގައި ބިންގާ އެޅުނު، ހޮސްޕިޓަލް 2016 ގައި ހުޅުވޭނެ.
– 2007 ވަނަ އަހަރު ބިނާކުރަން ފެށި އައިޖީއެމްއެޗްގެ އާ އިމާރާތް އަދިވެސް ނުނިމޭ، އެހެން ކަމުން 2 އަހަރު ތެރޭ އައްޑޫ 100 އެނދުގެ ހޮސްޕިޓަލް ނިންމިދާނެތަ ؟