މި އަހަރު ނިމުމުގެ ކުރިން ދަ ޑިމޮކްރެޓްސްގެ މެމްބަރުންގެ އަދަދު 10،000 އަށް ވުރެ މައްޗަށް ގެންދިޔުމަކީ އަމާޒެއް ކަމަށް، އެ ޕާޓީގެ ވަގުތީ ރައީސް ހުސެއިން ފިރުޝާން ވިދާޅުވެއްޖެ އެވެ.
ޑިމޮކްރެޓްސްގެ މަސައްކަތްތަކާއި ގުޅޭގޮތުން "ރާއްޖެޓީވީ"ގައި ވާހަކަދައްކަމުން ފިރުޝާން ވިދާޅުވީ މިދިޔަ ރައްޔިތުންގެ މަޖިލީހުގެ ޕްރައިމަރީގެ ތެރޭގައި ޑިމޮކްރެޓްސްގެ މެމްބަރުންގެ އަދަދު ދަށްވި ކަމަށާއި ނަމަވެސް ފާއިތުވި 7 މަސް ދުވަހުގެ ތެރޭގައި މެމްބަރުން އިތުރުކުރަން ހިންގި ހަރަކާތްތަކާއެކު، މެމްބަރުންގެ އަދަދަށް ފާހަގަކޮށްލެވޭ ވަރުގެ ކުރިއެރުމެއް ލިބިފައިވާ ކަމަށެވެ.
މީގެއިން ދައްކުވައިދެނީ ޑިމޮކްރެޓްސްއާ މެދު ރައްޔިތުންގެ އޮތް ޝައުގުވެރިކަން ކަމަށާއި، އަމާޒަކީ މި އަހަރުގެ ނިޔަލަށް މެމްބަރުންގެ އަދަދު 10،000 އަށް ވުރެ މައްޗަށް ގެންދިޔުން ކަމަށް ފިރުޝާން ވިދާޅުވި އެވެ.
"އަޅުގަނޑު ދެކޭ ގޮތުގައި، މި ކުރާ މަސައްކަތުން އެކަން ކުރެވޭނެ. މެމްބަރުން ލިބެނީ ވެސް އަދި ރައްޔިތުންގެ ތާއީދު ލިބެނީ ވެސް އެ ބަޔަކު ގަބޫލުކުރާ، ގަބޫލުކުރުންތަކަށް މަސައްކަތްކޮށްގެން ކަމަށް އަޅުގަނޑު ދެކެނީ،" ފިރުޝާން ވިދާޅުވި އެވެ.
ޑިމޮކްރެޓްސް އިން ގަބޫލުކުރާ ސިޔާސަތުތަކާއެކު މެމްބަރުން އިތުރުކުރަން މަސައްކަތްތަކެއް ކުރިއަށް ގެންދާނެ ކަމަށާއި، ބޭނުން ވަނީ ވީހާވެސް ގިނަ ޒުވާނުން އެ ޕާޓީއާ ގުޅި، ޒުވާނުން އެދޭ ބަދަލުތައް ސިޔާސަތަށް ގެންނަ ބަޔަކަށް ވުމަށް ކަމަށްވެސް ފިރުޝާން ވިދާޅުވި އެވެ.
އިލެކްޝަންސް ކޮމިޝަނުން އާންމުކޮށްފައިވާ ތަފާސް ހިސާބުތަކަށް ބަލާއިރު، މިދިޔަ އަހަރުގެ ސެޕްޓެމްބަރު 19 ގެ ނިޔަލަށް ޑިމޮކްރެޓްސްގައި ތިބީ 4،328 މެމްބަރުންނެވެ.
ޑިމޮކްރެޓްސް އަކީ އެމްޑީޕީގައި އިސްކޮށް އުޅުއްވުމަށް ފަހު ވަކިވެވަޑައިގެންނެވި ބޭފުޅުންތަކެއް އުފެއްދެވި ޕާޓީއެކެވެ. އެ ޕާޓީ އުފެއްދުމުގައި އެންމެ އިސްކޮށް ހުންނެވީ ކުރީގެ ރައީސް މުހައްމަދު ނަޝީދު އެވެ.