އަންނަ ހުކުރު ދުވަހު ރިލީޒްކުރަން ހަމަޖެހިފައިވާ އިންޑިއާގެ ބަތަލާ ކަންގަނާ ރަނާވަތުގެ ފިލްމު "އިމަޖެންސީ" އަވައްޓެރި ބަންގްލަދޭޝްގައ ދެއްކުން މަނާކޮށްފި އެވެ.
އިންޑޯ-އޭޝިއަން ނިއުސް ސާވިސް (އިއަންސް) އިން ބުނި ގޮތުގައި އެ ފިލްމު ބަންގްލަދޭޝްގައި ދެއްކުން މަނާކުރަން ނިންމީ އިންޑިއާ ބަންގްލަދޭޝްގައި މިހާރު އޮތް ސިޔާސީ ނުވަނަވަސްކަމުގެ އިތުރަށް ފިލްމުގައި، ބަންގްލަދޭޝްގެ ބާނީގެ ގޮތުގައި ސިފަކުރާ ކުރީގެ ރައީސް ޝައިހް މުޖީބުއް ރަހުމާން އަވަހަރާކޮށްލުމާ ގުޅޭ ގޮތުން އޮޅުންބޮޅުންވާ ކަހަލަ ގޮތަކަށް ވާހަކަތަކެއް ގެނެސްދީފައިވާތީ އެވެ.
މުޖީބަކީ މިދިޔަ އަހަރު ބަންގްލަދޭޝްގެ ބޮޑުވަޒީރުކަމުން އިސްތިއުފާ ދެއްވައި ފިއްލަވައިގެން އިންޑިއާ އަށް ވަޑައިގެންނެވި ޝައިހް ހަސީނާގެ ބައްޕާފުޅެވެ. މުޖީބު އަވަހާރަކުރީ އޮގަސްޓް 15، 1975 ގަ އެވެ.
ކަންގަނާ، ޕްރޮޑިއުސްކޮށް، ޑައިރެކްޓްކޮށް އަދި ކުޅުނު "އިމަޖެންސީ" އަކީ އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ވެރިކަމުގައި 1975-1977 އަށް އިއުލާންކުރި ކުއްލި ހާލަތާއި އޭގެ ސަބަބުން އުފެދުނު ސީޔާސީ ދިލަ އާއި ކޯޅުންގަނޑަށް ބިނާކޮށް ހަދާފައިވާ ބައޮގްރަފިކަލް ސިޔާސީ ފިލްމެކެވެ.
މީގައި ކަންގަނާ ކުޅެފައި ވަނީ އިންދިރާގެ ރޯލެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "އިމަޖެންސީ" ގެ ކާސްޓްގައި އަނޫޕަމް ކޭރް، މަހީމާ ޗައުދަރީ، މިލިންދު ސޯމަން، ޝްރެޔަސް ތަލްޕަޅޭ އަދި މަރުވެފައިވާ އެކްޓަރު ސަތިޝް ކޯޝިކް ހިމެނެ އެވެ.
މި ފިލްމު ބަންގްލަދޭޝް އިން މަނާކުރި އެ ގައުމުގައި އިންޑިއާގެ ފިލްމުތައް އަޅުވަނީ މަދުންކަން ފާހަގަކޮށްލެވެ އެވެ.