ހުޅުމާލޭގެ ސްޓެލްކޯގެ ޓްރާސްފޯމަރަކުން ވައްކަން ކުރަން އުޅެނިކޮށް ރޭ އަތުލައިގަތް މީހާގެ ވަންވަރު އާންމުކޮށްފި އެވެ.
ފުލުހުން ބުނީ އެއީ ށ. ބިލެތްފެހި، ޗަނބޭލީގެ އިބްރާހީމް ޒާލިފް، 37، ކަމަށެވެ.
އޭނަ ރޭ އަތުލައިގަތީ 9:30 ހާއިރު ކަރަންޓު ޓްރާންސްފޯމަރެއްގެ ތެރެއަށް ވައްކަން ކުރަން ވަދެ އޮއްވަ އެވެ. ވައްކަން ކުރިކަން އެނގުނީ ނަރު ބުރިކޮށްލުމުން އެމްޕީއެލް ފްލެޓްތަކުން ކަރަންޓު ކެނޑުމުންނެވެ.
އެކަމާ ގުޅިގެން ސަރަހައްދުގައި ހުރި ސްޓެލްކޯގެ މުވައްޒަފަކު އެތަނަށް ދިޔައިރު ދެ ވަގަކު އެތަނުގައި ތިބި ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެފައިވެ އެވެ. އަދި އެ މީހުން ހުއްޓުވަން މަސައްކަތް ކުރުމުން އެމީހުންގެ އަތުގައި އޮތް ރެންޗަކުން ޖަހައި މާރާމާރީ ވެސް ހިންގި އެވެ. އެ މާރާމާރީގައި ސްޓެލްކޯ މުވައްޒަފުގެ ބޮލާއި އަނގަމަތި ފަޅައިގެން ދިޔަ އެވެ.
އެ މައްސަލައިގައި ޒާލިފް އަތުލައިގަނެ، ފުލުހުންގެ ބެލުމުގެ ދަށަށް ގެންދިޔަ ނަމަވެސް ދެވަނަ މީހާ އަދި ހައްޔަރެއް ނުކުރެ އެވެ.
މި މައްސަލަ ފުލުހުން އަންނަނީ އިތުރަށް އިތުރަށް ތަހުގީގު ކުރަމުންނެވެ.
މި ފަހަކަށް އައިސް ޓްރާންސްފޯމަރުތަކުން ވައްކަން ކުރުމާއު ގެއްލުން ދިނުން ފަދަ ހާދިސާތައް ގިނަ އެވެ. އަދި ޓްރާންސްފޯމަރަކުން ވައްކަން ކުރަން އުޅެނިކޮށް މިދިިޔަ އަހަރު މީހަކު މަރުވެސް ވެފައިވެ އެވެ.