އަލިފާން ރޯވެ ބޮޑެތި ގެއް.ލުންތަކެއް ލިބުނު އެމެރިކާގެ ކެލިފޯނިއާ ލޮސް އެންޖެލިސް އަށް އެހީވާން ހޮލީވުޑްގެ މަޝްހޫރު ފިލްމީ ތަރި، ލިއޮނާޑޯ ޑި ކެޕްރިއޯ އެއް މިލިއަން ޑޮލަރު ހަދިޔާކުރަން ނިންމައިފި އެވެ.
މި ވާހަކަ އިންސްޓަގްރާމް ސްޓޯރީގައި ހިއްސާކޮށް "ޓައިޓޭނިކް" ގެ ބަތަލު ބުނީ އޭނަ އެ ފައިސާ ހަދިޔާކުރަނީ ތިމާވެށީގެ މަސައްކަތްތައް ކުރާ ޖަމިއްޔާ ރީ.ވައިލްޑް އަށް ކަމަށެވެ. އަދި މި އެހީގެ ސަބަބުން ލޮސް އެންޖެލިސްގައި މި ވަގުތު އެންމެ ބޮޑަށް އެހީ ބޭނުންވެފައިވާ އެކި ފަރާތްތަކަށް އެކި ގޮތުން އެހީ ފޯރުކޮށް ދެވޭނެ ކަމަށް ލިއޮނާޑޯ ބުންޏެވެ.
ކާމިޔާބު އެތައް ފިލްމެއް ކުޅެފައިވާ 50 އަހަރުގެ އެކްޓަރު މީގެ ކުރިން ވެސް އެކި ހާދިސާތަކާ ގުޅިގެން ފައިސާގެ ބޮޑެތި އެހީތައް ފޯރުކޮށް ދީފައިވެ އެވެ.
މި ހަފުތާގެ ތެރޭގައި މަޝްހޫރު ލަވަކިޔުންތެރިޔާ ބިޔޯންސޭ ވެސް ވަނީ އެލްއޭ އަށް އެހީވާން 2.5 މިލިއަން ޑޮލަރި ހަދިޔާކޮށްފައިވެ އެވެ. މީގެ އިތުރުން ބަތަލާ އީވާ ލޮންގޯރިއާ ވެސް އެއް މިލިއަން ޑޮލަރު ހަދިޔާކޮށްފައިވެ އެވެ.
މީޑިއާތަކުން ބުނެފައިވާ ގޮތުގައި އަލިފާންގެ ހާދިސާއާ ގުޅިހެން ރިލީފް ފަންޑްތަކަށް ވަރަށް ގިނަ ފަރާތްތަކުން މިހާރު އެހީވަމުން އަންނަ އިރު ނެޓްފްލިކްސް އިން 10 މިލިއަން ޑޮލަރު، ޑިޒްނީން 15 މިލިއަން ޑޮލަރު، ވޯން ބްރޮސް ޑިސްކަވަރީން 15 މިލިއަން ޑޮލަރު، ގޫގުލް އާއި ޔޫޓިއުބް ގުޅިގެން 15 މިލިއަން ޑޮލަރު އަދި ސްކްރީން އެކްޓާސް ގިލްޑް އިން ވެސްމެންބަރުންނަށް އެހީވާން އެއް މިލިއަން ޑޮލަރުގެ އެހީ ދީފައިވެ އެވެ.