ފްރާންސްގެ ވެރިރަށް ޕެރިހަށް، ޕާކިސްތާންގެ ގައުމި އެއާލައިން، ޕާކިސްތާން އިންޓަނޭޝަނަލް އެއާލައިން (ޕީއައިއޭ) އިން މި މަހުގެ 10 ގައި ދަތުރުތައް ފެށުމާ ދިމާކޮށް އެކަން ޕްރޮމޯޓްކުރަން އާންމުކުރި އިޝްތިހާރަކަށް ފާޑިކިޔުންތައް އަމާޒުވެއްޖެ އެވެ.
މި އިޝްތިހާރުގައި ފެންނަނީ އެ އެއާލައިންގެ ބޯޓެއް ފްރާންސްގެ މަޝްހޫރު އައިފުލް ޓަވަރާ ދިމާއަށް ދާ ތަނެވެ. އަދި އޭގައި ލިޔެފައި އިންނަނީ "ޕެރިސް، ވީ އާ ކަމިން ޓުޑޭ" އެވެ. މި އިޝްތިހާރު ޕީއައިއޭގެ ސޯޝަލް މީޑިއާ އެކައުންޓްތަކުގައި ވެސް ޕޯސްޓްކޮށްފައިވާ އިރު، ގިނަ ބަޔަކު އެއަށް ފާޑު ކިޔައި، މި އިޝްތިހާރުން ބިރުވެރިކަން ގެނެސްދޭނެ ކަމަށް ބުނެފައިވެ އެވެ.
އެގޮތުން އިޝްތިހާރުން ހަނދާން އާކޮށްދެނީ ސެޕްޓެމްބަރު 9، 2001 ގައި އެމެރިކާގެ ނިއު ޔޯކްގެ ޓްވިން ޓަވަރުގައި މަތިންބޯޓްތަކެއް ޖައްސައި ގޮއްވާލި ހާދިސާގެ މަންޒަރު ކަމަށް، ޕޯސްޓަށް ކޮމެންޓްކުރި ބައެއް މީހުން ބުނެފައިވެ އެވެ. އެހެންވެ ޕީއައިއޭގެ އިޝްތިހާރަކީ ނުރައްކަލެއްގެ އިންޒާރެއްގެ ގޮތުގައި ވެސް ބައެއް މީހުން ސިފަކޮށްފައިވެ އެވެ. އަދި ބައެއް މީހުން ވަނީ ޕީއައިއޭގެ މި އިޝްތިހާރުގެ ގްރެފިކްސްގެ ހަދާފައި ވަނީ އުސާމާ ބިން ލާދިން ކަމަށް ވެސް ބުނެފަ އެވެ.
ބައެއް ކޮމެންޓްތަކުގައި ބުނެފައި ވަނީ ޕީއައިއޭ އިން ޕެރިހަށް ހަމަލާއެއް ދޭން އުޅެނީ ކަމަށެވެ.
ޕީއައިއޭގެ މި އިޝްތިހާރަށް ފާޑުކިޔުންތައް އަމާޒުވުމާ ގުޅިގެން ޕާކިސްތާންގެ ބޮޑުވަޒީރު ޝެހްބާޒް ޝަރީފު ވަނީ ކަމާބެހޭ ފަރާތްތަކަށް އިޝްތިހާރުގެ މައްސަލަ ތަހުގީގު ކުރަން ގޮވާލައްވައިފަ އެވެ. އަދި ބޮޑުވަޒީރުގެ ނައިބު އިސްހާގް ދާރް ވެސް ވަނީ އެ އިޝްތިހާރަކީ ޒިންމާދާރުކަން ކުޑަކޮށް ހަދާފައިވާ އެއްޗެއް ކަމަށް ވިދާޅުވެ ފާޑު ވިދާޅުވެފަ އެވެ.
ނަމަވެސް މިކަމާ ގުޅިގެން ޕީއައިއޭ އިން އަދި އެއްވެސް އެއްޗެއް ނުބުނެ އެވެ.