ފަތުރުވެރިންގެ ބަޔަކު އައްޑޫން ކުއްޔަށް ހިފައިގެން ދިވެހި ފަޅުވެރިންނާ އެކު އިއްޔެ ކަނޑަށް ނުކުތް 'ފަހިރޯޅި' ދޯނި ރާއްޖޭގެ އީއީޒެޑް (އިޤްތިސާދީ ސަރަހައްދު/ އެކްސްކްލޫސިވް އިކޮނޯމިކް ޒޯން) އިން ބޭރަށް ގޮސްފައި ނުވާކަން ހާމަވެއްޖެއެވެ.
މިކަން ހާމަވެފައިވަނީ، ދޯނީގެ ވެރިފަރާތުން 'އައްޑޫލައިވް' އާއި ހިއްސާކޮށްފައިވާ، އެ ދޯނީގެ ހަރުކޮށްފައިވާ ވެސެލް ލޮކޭޓިން ޑިވައިސް(ވީއެލްޑީ) އިން ލިބުނު މައުލޫމާތު ތަކުންނެވެ.
ވީއެލްޑީ އަކީ ފިޝަރީޒް މިނިސްޓްރީ އިން މަސްވެރިކަމުގެ ލައިސަންސް ދޫކުރާ އުޅަނދުފަހަރުގެ ހަރަކާތްތައް މޮނީޓާ ކުރުމަށް ކޮންމެ ދޯންޏެއްގައި ވެސް، ހަރުކުރަން ޖެހޭ ޑިވައިސްްއެކެވެ. މައުލޫމާތު ލިބިފައިވާ ގޮތުގައި މަސްވެރިކަމުގެ ލައިސަންސް ދޫކުރަނީ އެ ޑިވައިސް ހަރުކުރުމަށް އެދި ފޯމް ހުށަހެޅުމުންނެވެ.
ވީއެލްޑީ ހަރުކޮށްފައިވާ ދޯނިތަކުގެ ހަރަކާތްތައް ބެލެނީ، ދިރާގް، އެމްއެންޑީއެފް، ފިޝަރީޒް މިނިސްޓްރީ އަދި، ދޯނީގެ ވެރިފަރާތަށް އެކަންޏެވެ. މި ޑިވައިސް އިން ކޮންމެ ގަޑިއިރަކު 1 ފަހަރު ދޯނީގެ ލޮކޭޝަނާއި އަދި ސްޕީޑް ބެލެއެވެ. ދޯނި ޓްރެކް ކުރުމަށް ދިރާގުން ދީފައިވާ އީމެއިލް އަދި ޕާސްވޯޑް ބޭނުންކޮށްގެން "ގޯސްޓްޓްރެކާ" ނަމަކަށް ކިޔާ ވެބްސައިޓަކަށް ވަދެ ދޯނި ފާއިތުވި 90 ދުވަހު ދަތުރުކޮށްފައިވާ ގޮތް ވަރަށް ރަގަޅަށް ބަލާލެވެއެވެ.
'ފަހިރޯޅި' ދޯނި އައްޑޫގެ އެތެރެވަރިން ނިކުމެފައިވަނީ ކޯއްޓޭ އާއި ދިމާލުންނެވެ. އޭރު ދޯނި ދުއްވާފައިވަނީ 10 ނޮޓިކަލް މޭލް ބާރު މިނުގައެވެ. މިސަބަބަށް ޓަކައި ދޯނި ނިކުމެފައިވަނީ، ފޯޅަވައްސަށް ދާން އޮންނަ އެންމެ ކުރ މަގު ހޯދުމަށް ފަހު ކަމަށް ކޯސްޓްގާޑުން ބުނެފައިވާ ވާހަކަ ދޯނީގެ ވެރިފަރާތުން ދޮގުކުރެއެވެ.
ފަހިރޯޅި ދޯނި އޯގަސްޓް 9 ވަނަ ދުވަހުގެ 17:36 އެހާކަށް ހާއިރު، ދުއްވާފައި ވަނީ 8 ނޯޓިކަލް މޭލު ބާރު މިނުގައި އައްޑޫ އަތޮޅުގެ ދެކުނާއި ދިމާލަށެވެ.
'ފަހިރޯޅި' ދޯނި އައްޑޫގެ ދެކުނާއި ދިމާލަށް ދުއްވާފައި ދަނިކޮށް އަނބުރާ ދިއުމަށް ކޯސްޓްގާޑުގެ ހެލިކޮޕްޓަރުން އަންގައިގެން ދޯނި އަނބުރާލާފައި ވަނީ އެރޭގެ 19:36 އެހާކަށް ހާއިރު ކަން ވެސް ވީއެލްޑީގެ މައުލޫމާތުގެ އަލީގައި ވަނީ ކަށަވަރުކުރެވިފައެވެ. އޭރު ދޯންޏަށް ދަތުރުކުރެވިފައިވަނީ އައްޑޫގެ ދެކުނުން 63.93 މޭލަށެވެ.
ރާއްޖޭގެ އީއީޒެޑް އިން ބޭރަށް ދިއުމަށް އެންމެ ފަހުން 'ފަހިރޯޅި' ދޯނީގެ ސިގްނަލް ލިބިފައިވާ ލޮކޭޝަނުން ފެށިގެން 100 މޭލަށް ވުރެ ބޭރަށް ދަތުރުކުރަން ޖެހެއެވެ. ދޯނީގައި ހަރުކޮށްފައިވާ ވީއެލްޑީގެ ސިގްނަލް މެދުނުކެނޑި ކޮންމެ ގަޑިއަކު އެއްފަހަރު ލިބެމުން ގޮސްފައިވާތީ ޔަޤީންކަމާއި އެކު އެނގޭ އެއްކަމަކީ ރާއްޖޭގެ އީއީޒެޑް އިން ބޭރަށް ދޯނި ގޮސްފައި ނުވާކަމެވެ.
ދޯނީގެ ވެރިފަރާތުން، 'އައްޑޫލައިވް' އަށް މައުލޫމާތު ދެމުން ބުނިގޮތުގައި، ކަމުގެ ހަޤީޤަތް އޮޅޭގޮތަށް ކޯސްޓް ގާޑުން މައުލޫމާތު ފެތުރުމަކީ ވަރަށް ހިތާމަކުރާ ކަމެއް ކަމަށެވެ.
އިތުބާރު ހުރިގޮތެއްގައި އައްޑޫލައިވް އަށް އެނގިފައިވާ ގޮތުގައި ފަތުރުވެރިން، އެންމެ ފުރަތަމަ ކުއްޔަށް ހިފަން ނިންމީ، ހުޅުދޫގެ މަސްދޯންޏެއް ކަމަށްވާ، 'ޖޫލީ' ދޯންޏެވެ. ކޯސްޓްގާޑަށް ގުޅައި 'ފަހިރޯޅި' ދޯނި، ދަތުރުކުރަނީ ފޯޅަވައްސަށް ދާން ކަމަށް ރިޕޯޓްކޮށްފައިވަނީ 'ޖޫލީ' ދޯނީގެ ފަރާތުން ކަމަށް މަރަދޫގެ ގިނަ މަސްވެރިން ވެސް ތުހުމަތު ކުރެއެވެ.
މަސްވެރިންތަކާއި ގުޅުން ހުރި މިފަދަ ކަމެއް ހިނގާފައިވާއިރު މިކަމުގައި ފިޝަރީޒް މިނިސްޓްރީ އިން ވަކި އެއްޗެއް ބުނެފައި ނުވާތީ މަރަދޫގެ މަސްވެރިން ގެންދަނީ އެކަމާއި ނުރުހުން ފާޅުކުރަމުން ކަން ވެސް ފާހަގަކޮށްލެވެއެވެ.