ކުރީގެ ބޮޑު ވަޒީރު އިމްރާން ޚާން އަށް 14 އަހަރުގެ ޖަލު ހުކުމެއް އިއްވައިފި އެވެ.
އިމްރާނަށް 14 އަހަރުގެ ޖަލު ހުކުމެއް އިއްވީ އޭނާގެ މައްޗަށް އުފުލާފައިވާ ކޮރަޕްޝަންގެ ދައުވާ ސާބިތުވުމުންނެވެ. މި މައްސަލައިގައި އިމްރާންގެ އަނބިކަނބަލުން ބުޝްރާ ބިބީ 7 އަހަރަށް ޖަލަށްލާން ވެސް މިއަދު ވަނީ ހުކުމްކޮށްފަ އެވެ.
ދިގު މުއްދަތަކަށް ޖަލަށްލުމުގެ އިތުރުން އެއް މިލިއަން ޕާކިސްތާން ރުޕީސް އިން އިމްރާން ވަނީ ޖޫރިމަނާ ވެސް ކޮށްފަ އެވެ.
މިއީ އޮގަސްޓް 2018 އިން ފެށިގެން އޭޕްރީލް 2022 އާ ހަމައަށް ޕާކިސްތާނުގެ ބޮޑުވަޒީރަކަށް ހުންނެވި އިމްރާންގެ މައްޗަށް ކުށް ސާބިތުވި ހަތަރުވަނަ މައްސަލަ އެވެ. އިމްރާން ގެންދަވަނީ 2023 އިން ފެށިގެން ޖަލުގައި ދުވަސްތައް ހޭދަކުރައްވަމުންނެވެ.
އިމްރާންގެ މައްޗަށް އަދިވެސް ގިނަ މައްސަލަތަކެއްގައި ދައުވާތަކެއް އުފުލާފައިވާއިރު، އޭނާ ވަނީ މިއީ ޕާކިސްތާނު ސަރުކާރުން ސިޔާސީ ބޭނުމެއްގައި ކުރަމުންދާ ކަންތައްތަކެއް ކަމަށް ވިދާޅުވެފަ އެވެ.