އިޒްރޭލުން ފަލަސްތީނުގެ ގާޒާއަށް ހަމަލާތައް ދިނުން ހުއްޓާލުމަށް އެކުލަވާލި އެއްބަސްވުމަށް، އިޒްރޭލުގެ ކެބިނެޓުން ރުހުން ދީފި އެވެ.
މި އެއްބަސްވުމަށް ރުހުން ދޭން ފެންނަ ކަމަށް އިޒްރޭލު ކެބިނެޓުގެ 24 ވަޒީރަކު ވޯޓު ދެއްވި އެވެ. އެއްބަސްވުމަށް ރުހުން ދިނުމާ ދެކޮޅަށް 8 ވަޒީރަކު ވަނީ ވޯޓު ދެއްވާފަ އެވެ.
ގަތަރު މެދުވެރިއެއްގެ ދައުރު އަދާކޮށްގެން ކުރިއަށްގެންދިޔަ މަޝްވަރާތަކުގައި އެކުލަވާލި އެއްބަސްވުމަށް އަމަލުކުރަން ފެށުމަށް ހަމަޖެހިފައިވަނީ މާދަމާ އެވެ.
މި އެއްބަސްވުން އެކުލަވާލާފައިވަނީ ތިން މަރުހަލާއަކަށް ބަހާލައިގެން ކަމަށްވާއިރު، އެއްބަސްވުމުގެ ދަށުން ހަމަލާތައް ހުއްޓާލުމުގެ އިތުރުން ހަމާސް އިން ރަހީނުކޮށްފައިވާ އިޒްރޭލު މީހުން މިނިވަން ކުރުން ވެސް ހިމެނެ އެވެ. އަދި އިޒްރޭލުން ހައްޔަރުކޮށްފައިވާ ފަލަސްތީނު ރައްޔިތުން ވެސް މި އެއްބަސްވުމުގެ ދަށުން މިނިވަން ކުރަން ޖެހޭއިރު، ގާޒާއަށް އިންސާނީ އެހީ ވެސް ގިނަ އަދަދަކަށް ފޯރުކޮށްދޭންޖެހެ އެވެ.
ހަމަލާތައް ދިނުން ހުއްޓާލުމަށް އެއްބަސްވުން އެކުލަވާލި ފަހުން ވެސް އިޒްރޭލުން އަންނަނީ ގާޒާއަށް ހުއްޓުމެއް ނެތި ހަމަލާތައް ދެމުންނެވެ. އެގޮތުން މި ހަމަލާތަކުގައި ގާޒާއިން 116 މީހަކު ވަނީ ޝަހީދުވެފަ އެވެ. އޭގެތެރޭގައި އަންހެނުންނާއި ކުޑަކުދިން ވެސް ހިމެނެ އެވެ.
އިޒްރޭލުން ފަލަސްތީނަށް ހަމަލާދޭން ފެށީ 2023 ވަނަ އަހަރު އޮކްޓޫބަރު މަހުގެ 7 ވަނަ ދުވަހު ކަމަށްވާއިރު، އެ ހަމަލާތަކުގައި ގާޒާ އިން 46،000 އަށް ވުރެ ގިނަ މީހުން ވަނީ ޝަހީދުވެ، 109،378 މީހަކަށް އެކި ވަރުގެ އަނިޔާތައް ވަނީ ލިބިފަ އެވެ.
ހަނގުރާމައިގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ގޮސްފައިވާއިރު، ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.