ބީޕީން މުވައްޒަފުން މަދުކުރަނީ

އިނގިރޭސވިލާތުގެ ތެޔޮ ކުންފުނި، ބީޕީން ގިނަ އަދަދެއްގެ މުވައްޒަފުން މަދުކުރަން ނިންމައިފި އެވެ.

ކުންފުނިން ބުރާސްފަތި ދުވަހު މުވައްޒަފުންނަށް ފޮނުވި މެމޯއެއްގައި ބުނީ މުވައްޒަފުންގެ ތެރެއިން 5 ޕަސެންޓް މުވައްޒަފުން މި އަހަރުގެ ތެރޭގައި މަދުކުރަން ނިންމާފައިވާ ކަމަށެވެ. މިއާ އެކީ 90،000 އެއްހާ މުވައްޒަފުން ތިބި ބީޕީން މި އަހަރުގެ ތެރޭގައި ގާތްގަނޑަކަށް 4،700 އެއްހާ މުވައްޒަފުން ދޫކޮށްލާނެ އެެވެ.

މީގެ އިތުރުން ކުންފުނީގައި ކޮންޓްރެކްޓް އުސޫލުން މަސައްކަތް ކުރާ 3،000 މުވައްޒަފަކު ވެސް ދޫކޮށްލަން ވަނީ ނިންމައިފަ އެވެ، އެގޮތަށް ނިންމި އިރު މިހާރު ވެސް 2،600 ކޮންޓްރެކްޓަރުން ވަނީ ބީޕީ ދޫކޮށްލައިފަ އެވެ.

އެ ކުންފުނިން ބުނީ މުވައްޒަފުން މަދުކުރަނީ ހިންގުމުގެ ހަރަދު ކުޑަކުރަން ކަމަށެވެ. މިއާ އެކީ ބޭނުން ވަނީ "ވޯކްފޯސް" މިހާރަށް ވުރެ ވަރުގަދަ ކުރަން ކަމަށް ބުންޏެވެ.

"ވާދަވެރި މާހައުލެއްގައި ސާބިތުކަމާ އެކު ދެމަހެއްޓުމަށްޓަކައި އެބަޖެހޭ މިކަހަލަ ބައެއް ފިޔަވަޅުތައް އަޅައި ބަދަލުތަކެއް ގެންނަން." ބީޕީގެ ތަރުޖަމާން މީޑިއާތަކަށް ވިދާޅުވި އެވެ.

އޭނަ ވިދާޅުވި ގޮތުގައި ފާއިތުވި މުއްދަތު ތެރޭގައި ކުންފުނީގެ މުވައްޒަފުންގެ އަދަދު ވަރަށް ބޮޑަށް އިތުރުވެފައިވެ އެވެ. އެކަމާ ހެދި ކުންފުންޏަށް ބުރަތަކެއް އެބަހުރި ކަމަށް ވިދާޅުވި އެވެ. ނަމަވެސް މުވައްޒަފުން މަދުކުރާ އިރު، އެކަން ކުރަން ނިންމާފައި ވަނީ ކުންފުނީގެ ކޮންކޮން ދިމާލަކުން، ކޮންކޮން ސަރަހައްދުތަކަކުން ކަމެއް ބީޕީން ހާމައެއް ނުކުރެ އެވެ.

އެ ކުންފުނީގެ ސީއީއޯ މުރޭ އޮޗިންކްލޮސް މިދިޔަ އަހަރުގެ އެޕްރީލްގައި ވިދާޅުވެފައި ވަނީ އަމާޒަކީ އަންނަ އަހަރު ނިމޭ އިރު، ކުންފުނީގެ ހަރަދު 2 ބިލިއަން ޑޮލަރަށް ދަށްކުރުން ކަމަށެވެ.

ބީޕީ އަކީ މީގެ 115 އަހަރު ކުރިން އެޕްރީލް 14، 1909 ގައި ވުޖޫދަށް އައި ކުންފުންޏެކެވެ.