މޯލްޑިވްސް އިމިގްރޭޝަނަށް ފިލުމަށް ބިދޭސީ މަސައްކަތްތެރިންތަކެއް ރ. މަޑުއްވަރީ އަށް އަރާފައިވާ ކަމަށް އެ ރަށު ކައުންސިލުން ބުނެފި އެވެ.
މަޑުއްވަރީ ކައުންސިލުން ބުނީ އެމަރަލްޑް ރިސޯޓުގައި މަސައްކަތްކުރާ 60 ވަރަކަށް ބިދޭސީ މަސައްކަތްތެރިން އިމިގްރޭޝަނަށް ފިލައިގެން މަޑުއްވަރީ އަށް އައިސް ޙަރަކާތްތެރިވާކަން އެނގިފައިވާ ކަމަށެވެ.
މި ބިދޭސީންގެ ތެރެއިން މީހަކު ރަށުގެ އެއްވެސް ސަރަޙައްދަކުން ފެނިއްޖެނަމަ ނުވަތަ މީގެން މީހަކާއި ގުޅޭ އެއްވެސް މަޢުލޫމާތެއް ލިބިފައިވާނަމަ ލަސްނުކޮށް އެންގުމަށް ކައުންސިލުން ވަނީ އެދިފަ އެވެ. އަދި މި މީހުންގެ ތެރެއިން އެއްވެސް ބިދޭސީއަކާއި ރަށުގެ އެއްވެސް ފަރާތަކުން ހަވާލުނުވުމަށް ވެސް ވަނީ އިލްތިމާސްކޮށްފަ އެވެ.
ގަވާއިދާ ހިލާފަށް އުޅޭ ބިދޭސީން ހޯދަން އިމިގްރޭޝަނުން އަންނަނީ ރާއްޖޭގެ އެކި ކަންކޮޅުތަކުގައި ފުލުހުންނާއި ގުޅިގެން އޮޕަރޭޝަންތައް ހިންގަމުންނެވެ. މިފަދަ އޮޕަރޭޝަން ތަކުގައި މިހާތަނަށް ގިނަ އަދަދެއްގެ ބަޔަކު އަތުލައިގެންފައިވާއިރު، އޭގެ ތެރެއިން 5،000 އަށް ވުރެ ގިނަ މީހުން މިހާތަނަށް ޑިޕޯޓްކޮށްފައިވެ އެވެ.